Qazaqstan Prezıdenti Úndistannyń Premer-Mınıstrimen kezdesti

ASTANA. QazAqparat - Memleket basshysy Nursultan Nazarbaev Úndistannyń Premer-Mınıstrimen júzdesip, eki el arasyndaǵy qarym-qatynas ózara qurmet pen senimge negizdelgenin atap ótti, dep habarlaıdy Aqordanyń baspasóz qyzmeti. 

- Úndistannyń Shanhaı yntymaqtastyq uıymyna múshe bolý protsesi osydan 12 jyl buryn bastaldy. Erteń Úndistan osy uıymnyń tolyq quqyly múshesi bolady. Úndistan sııaqty myqty eldiń qatarymyzǵa qosylýy birlese sheshetin máseleler aıasyn keńeıtýge múmkindik beredi, - dedi Nursultan Nazarbaev. 

Memleket basshysy Qazaqstan men Úndistan ekonomıkanyń túrli salasynda ózara is-qımyl jasaýdyń júzege aspaǵan orasan zor áleýetine ıe ekenin atap ótti.

Úndistannyń Premer-Mınıstri qonaqjaılyq kórsetkeni úshin Nursultan Nazarbaevqa rızashylyǵyn bildirdi.

-2015 jyly Qazaqstanǵa alǵash ret kelgenimde Sizdiń Astanany damytý jónindegi kózqarasyńyzdan, Qazaqstannyń jalpy ekonomıkalyq progresinen erekshe áser aldym, - dedi Narendra Modı. 

Kezdesý sońynda taraptar ózara is-qımyldyń ózekti máseleleri jóninde pikir almasty.