Qazaqstan Prezıdenti otandyq dıplomatııanyń shırek ǵasyrdaǵy jetistikterin atady

ASTANA. QazAqparat - Qazaqstannyń dúnıejúzindegi beıbitshilik pen yntymaqtastyqqa qosatyn úlesi jyldan jylǵa artyp kele jatyr. Búgin Aqordada elimizde tirkelgen dıplomatııalyq mıssııalar men halyqaralyq uıymdar ókildikteriniń basshylarymen dástúrli kezdesýi barysynda Qazaqstan Prezıdenti Nursultan Nazarbaev osylaı dedi, dep habarlaıdy QazAqparat. 

Kezdesý barysynda Qazaqstan Prezıdenti shırek ǵasyrda otandyq syrtqy saıasat qalyptasyp, eldiń ıgiligi úshin jumys istep jatqandyǵyn basa aıtty.

«Birinshiden, biz ózimizdiń ulttyq táýelsizdigimiz ben aýmaqtyq tutastyǵymyzdy qorǵap qaldyq. Bul jolda dıplomattardyń istegen jumysy az emes. Qaýipsizdik kepildikterin alyp, tóńiregimizde tatý kórshilik beldeýin qurdyq. Ekinshiden, qazirgi tańda Astana halyqaralyq antııadrolyq qozǵalystyń basshysy bolyp tanylyp otyr jáne strategııalyq turaqtylyq pen ádiletti álemdi qamtamasyz etýge óz úlesin qosyp otyrǵan memleket. Úshinshiden, Qazaqstan aýmaqtyq ekonomıkalyq ıntegratsııa, kooperatsııanyń aýqymdy jobalarynyń bastamashysy. Búkil dúnıejúzilik qaýymdastyq bul sharýamyzdy qoldap otyrǵanyn bilesizder», - dedi Nursultan Nazarbaev.

Qazaqstan Prezıdentiniń aıtýynsha, Táýelsiz Qazaqstan júrgizip kele jatqan kópvektorly saıasat, halyqaralyq bastamalary álemge keń tanylyp, qoldaýǵa ıe boldy.

«Elimizdiń dárejesi kóterildi. Qazaqstannyń dúnıejúzindegi beıbitshilik pen yntymaqtastyqqa qosatyn úlesi jyldan jylǵa artyp kele jatyr. Bul óte úlken eńbektiń arqasy. Sonyń ishinde bizdiń dıplomattardyń da jasaǵan jumysy eren», - dedi Elbasy.