Qazaqstan Prezıdenti Máýlen Áshimbaevty qabyldady
Memleket basshysyna partııanyń qazirgi jumystary, sonyń ishinde «Nur Otan partııasynyń XVIII seziniń sheshimderi men «Igilik barshaǵa! Sabaqtastyq, ádildik, órleý» saılaýaldy baǵdarlamasyn júzege asyrý jónindegi is-qımyldar Jospary, sondaı-aq, partııa Tóraǵasy - Elbasy Nursultan Nazarbaevtyń elimizdegi áleýmettik jaǵdaıdy jaqsartý jáne partııa jobalaryn odan ári damytýǵa baılanysty tapsyrmalarynyń oryndalýy týraly aqparat berildi.
Qazaqstan Prezıdenti partııanyń barlyq baǵyttaǵy, sonyń ishinde, halyqtyń ál-aýqatyn arttyrý boıynsha saılaýaldy baǵdarlamasynyń júıeli ári belsendi túrde atqarylýynyń mańyzdy ekenin atap ótti. Memleket basshysy qoǵammen konstrýktıvti dıalog ornatýda partııanyń alar orny erekshe ekenin aıtty.
«Qoǵamdyq senim jónindegi Ulttyq keńes elimizdi odan ári damytýǵa baǵyttalǵan túrli pikirler ashyq aıtylatyn, usynystar engiziletin naqty shynaıy dıalog alańy bolýy tıis. Keńeske barlyq múddeli ári jaýapty saıası kúshter, partııalar, úkimettik emes uıymdar jáne basqa da belsendiler atsalysýy qajet», - dedi Qazaqstan Prezıdenti.
Sonymen qatar, Máýlen Áshimbaev Qasym-Jomart Toqaevqa Túrkistan oblysynyń Arys qalasyndaǵy áskerı qoımada bolǵan jarylys saldarynan zardap shekkenderge partııanyń barlyq oblystardaǵy bólimshelerinde gýmanıtarlyq kómek jınaý ortalyǵynyń uıymdastyrylǵany jóninde habarlady.
