Qazaqstan Ózbekstanǵa shyǵaratyn eksportty 550 mln dollarǵa arttyra alady
ASTANA. KAZINFORM – Qazaqstan ózbek eline un, bıdaı jáne ózge de azyq-túlik ónimderin eksporttaýdy jalǵastyra beredi. Bul týraly Aqordada Ózbekstan Prezıdenti Shavkat Mırzıeevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
«Sapar aıasynda joǵary memleketaralyq keńestiń alǵashqy otyrysy ótti. Onda qabyldanǵan sheshimderdiń strategııalyq mańyzy óte zor. Keńes barysynda qazaq-ózbek yntymaqtastyǵynyń ózekti máseleleri jóninde pikir almastyq. Ózara seriktestikti nyǵaıta túsýdiń tıimdi joldaryn aıqyndadyq. Naqty kelisimderge qol jetkizdik. Atap aıtqanda, ekonomıkalyq baılanystardy kúsheıtýge kelistik», — dedi Memleket basshysy.
Qasym-Jomart Toqaev Qazaqstan men Ózbekstan Ortalyq Azııadaǵy saýda-sattyq boıynsha eń iri seriktester ekendigine toqtaldy.
«Byltyr ózara taýar aınalymy 4,4 mlrd dollarǵa jetti. Biz bul kórsetkishti taıaý arada 5, keıin 10 mlrd dollarǵa deıin jetkizý maqsatyn taǵy da atap kórsettik. Ol úshin alys-beristegi taýar túrlerin kóbeıtýimiz kerek. Sondaı-aq ekonomıkalyq yqpaldastyqty tejeıtin kedergilerdi joıý qajet. Jalpy, saýda-sattyqtyń aýqymyn keńeıtýge eki eldiń de múmkindigi mol. Qazirdiń ózinde Ózbekstanǵa shyǵaratyn eksportty 550 mln dollarǵa arttyra alamyz. ıAǵnı, óndirilgen taýardyń taǵy 40 túri boıynsha eksport jasaýǵa múmkindik bar. Ózbek eli de Qazaqstanǵa kóptegen ónimderin jiberip otyr», — dedi Memleket basshysy.
Prezıdent budan bólek, aýyl sharýashylyǵy salasyndaǵy yntymaqtastyq máselesi talqylanǵanyn aıtty.
«Byltyr osy saladaǵy taýar aınalymy 1,7 mlrd dollarǵa jetti. Bul jalpy saýda-sattyqtyń shamamen úshten bir bóligi degen sóz. Elimiz áleýmettik mańyzy joǵary agroónerkásip ónimderin Ózbekstannan ımporttaýǵa múddeli. Sonymen qatar ózbek eline un, bıdaı jáne ózge de azyq-túlik ónimderin eksporttaýdy jalǵastyra beremiz. Biz úkimetaralyq keńespen ǵana shektelip qalmaımyz. Túrli deńgeıdegi jan-jaqty yqpaldastyqty jandandyra túsemiz», — dedi Qasym-Jomart Toqaev.
