Qazaqstan Ózbekstanǵa elektr eksportyn nege toqtatty

NUR-SULTAN. QazAqparat – «KEGOC» kompanııasynyń ulttyq dıspetcherlik ortalyǵynyń bas dıspetcheri Bekjan Muqatov jyl basynan beri Qazaqstan qansha elektr qýatyn eksporttaǵanyn aıtty, dep habarlaıdy QazAqparat tilshisi.

«Birinshi jartyjyldyqta elektr energııasynyń profıtsıti boldy. Shamamen 600 mln MVt elektr qýatyn Ózbekstanǵa eksporttadyq. Bizde shoǵyrlanatyn energııa túgeldeı tutylyp, ózimizde jetpeıtindeı belgiler paıda bolǵan kezde eksporttaý operatsııalarynyń bári toqtatyldy», - dedi kompanııa ókili.

Onyń aıtýynsha, jyldyń qalǵan eki aıynda Qazaqstan Reseıden elektr qýatyn ımporttaýy múmkin.

«Búginge deıin, qazan aıyna deıin dese de bolady, Reseı Federatsııasynan jáne ózge elderden de elektr energııasy ımporttalǵan joq. Qazir, ıaǵnı qarasha men jeltoqsan aılarynda ımport bolatynyn joq shyǵarmaımyz. Sol úshin «Qazaqstan elektr energııasy men qýaty naryǵynyń operatory» AQ alańynda saýda-sattyq uıymdastyrylyp jatyr. Osy alańda tutynýshylardyń qajetti kólemdi Reseıden de satyp alýyna bolady. Qajettiliktiń ósý qarqyny saqtalsa, shamalap baǵalaý boıynsha, aıyna 400 mln KVt/saǵat bolýy múmkin. ıAǵnı, qarasha men jeltoqsan aılarynda osynsha kólemde elektr qýaty ımporttalýy yqtımal», - dedi Bekjan Muqatov.