Qazaqstan otandyq jańashyldarǵa granttar bóledi

ASTANA. Mamyrdyń 27-si. QazAqparat /Jasulan Amanbaıuly/ - Elimizdegi bıznes ortanyń belsendiligin kóterý maqsatynda bıyl jalpy somasy 1,5 mlrd. teńge bolatyn ınnovatsııalyq granttar bólinedi. Bul týraly búgin Astanada ótken baspasóz máslıhatynda «Injınırıng jáne tehnologııalar transferti» AQ Basqarma tóraǵasy Saıat Núsipov málim etti,

dep habarlaıdy QazAqparat.

Atalǵan granttar ınnovatsııalyq jobalardyń tehnıkalyq-ekonomıkalyq negizdemesin jasaýǵa, tájirıbe-konstrýktorlyq jumystardy atqarýǵa, qoldanbaly zertteýlerdi júrgizýge, zııatkerlik menshik quqyǵyn rásimdeýge, ony shetelde qorǵaýǵa jáne ozyq tehnologııalardy ıgerýge beriledi.

«Granttardyń 2010 jylǵa arnalǵan somasy 1,5 mlrd teńge. Іlki baǵdarlama elde keń óris alyp, óziniń qajettiligin aıqyndaıtyn bolsa, bul qarajattyń kólemi ulǵaıa beretin bolady», dep atap kórsetti S. Núsipov.

Onyń aıtýynsha, Údemeli ındýstrııalyq-ınnovatsııalyq baǵdarlamasy aıasynda qarastyrylyp otyrǵan bul granttar tek jańashyldarǵa ǵana emes, óziniń óndirisin ozyq ınnovatsııalyq tehnologııalarmen jańartýǵa múddeli ekonomıkanyń naqty sektoryna da úlken qoldaý bolmaq.

«Innovatsııalyq jobalar ǵylymı-tehnıkalyq, ekologııalyq jáne ekonomıkalyq saraptamadan ótedi. Kerek bolǵan jaǵdaıda patenttik zertteýler de júrgizilýi múmkin. Saraptamalar jasalysymen «Injınırıng jáne tehnologııalar transferti» nemese «Ǵylym qory» keshendi qorytyndy qujattardy daıyndap, negizgi sheshimdi qabyldaıtyn jáne quzyrly organ bolyp tabylatyn QR Indýstrııa jáne jańa tehnologııalar mınıstrligine joldaıdy», deıdi S. Núsipov baıqaýdyń negizgi úderisi jaıynda.

S. Núsipov, ınnovatsııalyq úderiste, ınnovatsııalyq júıede jumys jasap jatqan barlyq qatysýshylardy, jańashyldardy atalmysh baıqaýǵa qatysýǵa shaqyrdy.

Onyń aıtýyna qaraǵanda, granttar somasy árbir ınnovatsııalyq jobalardyń qajettiligine oraı aıqyndalady. Bir jobanyń oryndalýyna qajetti qarajattyń somasy 20 mln. teńgeden aspaýy tıis.

QR Indýstrııa jáne jańa tehnologııalar ınnovatsııalyq granttardy ıgerýge arnalǵan baıqaýdy mamyrdyń 17-de jarııalaǵan. Innovatsııalyq jobalardyń qujattaryn tapsyrý kezeńi bir aıǵa, maýsymnyń 17-ne deıin jalǵasyn tabady. Qujattardy «Injınırıng jáne tehnologııalar transferti» nemese «Ǵylym qory» aktsıonerlik qoǵamdarynyń elordadaǵy keńselerine tapsyrý qajet.