Qazaqstan Ortalyq Azııa elderine spýtnıktik baılanys qyzmetin kórsetpek

ASTANA. QazAqparat - Qazaqstandyq KazSat baılanys jáne habar taratý spýtnıktik júıesi óziniń qyzmet kórsetý aýqymyn keńeıtýdi josparlap otyr. Bul týraly QR Qorǵanys jáne aeroǵarysh ónerkásibi mınıstrliginiń alqa otyrysynda vedomstvonyń vıtse-mınıstri Marat Nurǵojın málim etti, dep habarlaıdy mınıstrliktiń baspasóz qyzmetine silteme jasaǵan QazAqparat tilshisi.

«Respýblıkamyzdyń «KazSat-2» jáne «KazSat-3» jerserikteri jáne jerústi basqarý keshenderinen quralǵan jeke ǵaryshtyq baılanys júıesi bar. 2023 jyly «KazSat-2» jerserigin paıdalanýǵa berý ýaqyty aıaqtalyp, ony almastyrý úshin «KazSat-2R» ǵarysh apparatyn iske qosý josparlanǵan», - dedi vıtse-mınıstr.

Onyń aıtýynsha, «KazSat-2R» jobasynyń mindeti - «KazSat-2» jerserigi arqyly jumys istep otyrǵan baılanys jelileriniń jumysyn rettep, spýtnıktik baılanys qyzmeti eksportyn Ortalyq Azııa elderine shyǵarý.

«KazSat» ǵaryshtyq baılanys júıesi elimizdiń búkil aýmaǵyndaǵy telekommýnıkatsııalyq operatorlar, ulttyq kompanııalar jáne holdıngter, memlekettik organdar men jeke uıymdar tsıfrlyq teleradıo habar taratý, Internet jelisine keń jolaqty qoljetimdilik, derekterdi berý jáne korporatıvtik spýtnıktik baılanys jelileri qyzmetterimen qamtamasyz etedi.

Avtor: Sara Qabıqyzy