Qazaqstan orbıtada jumys istep turǵan spýtnıkter sany boıynsha 30-orynda

NUR-SULTAN. QazAqparat– 2021 jylǵy 1 qyrkúıektegi jaǵdaı boıynsha Jer orbıtasynda 4550 belsendi spýtnık bolǵan, dep habarlaıdy QazAqparat Dewesoft zertteý tobynyń (UCS, ESRI jáne Space Foundation spýtnıkteriniń mádimetter bazasynyń negizinde) statıstıkasyna silteme jasap.

Jer orbıtasyndaǵy ǵarysh apparattarynyń sany boıynsha SpaceX kompanııasy kósh bastap tur - 1655 spýtnık (36%).

«Ekinshi orynda 288 spýtnıkpen OneWeb kompanııasy, úshinshi orynda 188 apparatpen Planet kompanııa» delingen aqparattyq bıýlletende.

Memleketter boıynsha AQSh-tyń orbıtada spýtnıkteri kóp – 2804 ǵarysh apparaty. Bul jalpy spýtnıkter sanynyń jartysynan kóbi.

Ekinshi orynda - Qytaı (467), úshinshi orynda - Ulybrıtanııa (349), tórtinshi – Reseı (168).

Qazaqstan bul tizimde alty spýtnıkpen 30-orynda. QR-nyń «Kazsat» eki baılanys spýtnıgi, «KazEOSat» eki qashyqtan zondtaý spýtnıgi men «KazSTSat» eki ǵylymı-tehnologııalyq spýtnıgi bar.

Tómengi Jerge jaqyn orbıtada 3 myńnan astam spýtnık bar – ádette munda baılanys jáne Jerdi qashyqtan zondtaý spýtnıkteri ornalasqan.

Osy jerden Starlink, HǴS jáne Habbl ǵarysh teleskobyn tabýǵa bolady.