Qazaqstan OPEK+ kelisiminen shyǵa ma
ASTANA. KAZINFORM — Bul suraqqa Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda jaýap berdi.
— Bilmeıtin adamdar úshin aıta keteıin, Biz - OPEK múshesi emespiz, OPEK+ kelisiminiń qatysýshysymyz. OPEK+ aıasynda óz mindettemelerimizdi barynsha oryndaýǵa tyrysamyz. Ár kezeńniń óz mejesi bar. Olardy árdaıym oryndaý múmkin bolmaýy yqtımal. Mysaly, bıyl Teńiz ken ornyn keńeıtý josparyna baılanysty osylaı boldy, — dedi Úkimet basshysy.
Oljas Bektenov Qazaqstannyń OPEK+ uıymynan bólek Teńiz, Qashaǵan, Qarashyǵanaq jobalary boıynsha ónim bólisý kelisimderi bar ekenin eske saldy.
— Taǵy da ónim bólisý týraly kelisim týraly aıtsaq, bári kelisilgen. Sondyqtan OPEK+ kelisimindegi áriptesterimizge ol mindettemeler týraly únemi aıtyp otyramyz. Mysaly, byltyr munaı óndirý kólemi jospardan tómen boldy. Biz seriktesterimizden munaı óndirý kólemin tómendetýdi talap ete almaımyz. Olar bolashaq keńeıtý jobasyna 49 mlrd salyp qoıdy. Osyǵan baılanysty munaı óndirý kólemin arttyryp, ınvestıtsııasyn ótep alǵysy keledi. Dál qazir OPEK+ kelisiminen shyǵý máselesi qarastyrylyp otyrǵan joq. Bul kelisim paıdaly dep esepteımiz. Óıtkeni onyń qyzmeti munaı naryǵyndaǵy turaqtylyqqa yqpal etip otyr. Shyǵý máselesi qarastyrylyp jatqan joq. Mindettemelerimizdi barynsha oryndaýǵa tyrysamyz, biraq ulttyq múddemizdi eskeremiz, — dedi Premer-mınıstr.
Buǵan deıin OPEK+ uıymynyń 8 eli munaı óndirý kólemin tamyz aıynda táýligine 548 barrelge deıin ulǵaıtýdy kózdep otyrǵanyn jazdyq.