Qazaqstan OPEK+ kelisimderine tolyq beıildi – Mınıstrlik
ASTANA. KAZINFORM – QR Energetıka mınıstrligi Qazaqstannyń OPEK+ kelisimi sheńberindegi mindettemelerden asyp ketýi týraly sheteldik BAQ-taǵy jarııalanymdarǵa qatysty málimdeme jasady.
– Qazaqstan Respýblıkasy Energetıka mınıstrligi birqatar sheteldik BAQ-taǵy jarııalanymdarǵa jaýap retinde OPEK+ kelisimine tolyq beıildiligin málimdeıdi jáne belgilengen kvotalardan tys óndirilgen kólemderdi óteý sharalaryn qosa alǵanda, óz mindettemelerin oryndaý boıynsha júıeli jumystardy jalǵastyryp jatyr. Aqpan aıyndaǵy kvota asyp ketýi Teńiz ken ornyndaǵy Bolashaq keńeıtý jobasy (BKJ) aıasyndaǵy tehnologııalyq protsesterge baılanysty boldy. Bul joba uzaq merzimdi sıpatqa ıe jáne turaqty energetıkalyq resýrstarmen qamtamasyz etýge, sondaı-aq bizdiń orta merzimdi mindettemelerimizdi oryndaýǵa baǵyttalǵan, - delingen habarlamada.
Qazaqstan Energetıka mınıstri Almasadam Sátqalıev eldegi iri aktsıonerlermen jáne jer qoınaýyn paıdalanýshylarmen kelissózder júrgizdi. Talqylaý barysynda OPEK+ kelisimi boıynsha mindettemelerdi oryndaý kestesi rastalyp, belgilengen kvotalardan tys óndirilgen kólemderdi óteý sharalary kelisildi.
Qazaqstan ýaqytsha óndiris kóleminiń artýyn óteý boıynsha qajetti sharalardy qabyldady.
– Jaqyn arada óndiris kólemi belgilengen lımıtterge tolyq sáıkes keletindeı etip retteletin bolady. Sonymen qatar Qazaqstannyń jahandyq munaı óndirisindegi úlesi nebári 1,5%, al OPEK+ sheńberinde shamamen 3% ekenin eskerý qajet. Bul kórsetkishter Qazaqstannyń álemdik suranys pen usynys balansyna aıtarlyqtaı áser etpeıtinin kórsetedi. Degenmen buǵan qaramastan, elimiz senimdi seriktes retinde óz mindettemelerin tolyq oryndap keledi. Qazaqstan álemdik munaı naryǵyndaǵy turaqtylyqty únemi qoldaıdy jáne OPEK+ kelisimderine tolyq beıildi. Biz seriktesterimizben tyǵyz yntymaqtastyqty jalǵastyryp, kelisilgen sheshimderdi ári qaraı oryndaýǵa daıynbyz. Qazaqstannyń munaı óndirý salasyn damytý jónindegi kez kelgen bolashaq josparlary halyqaralyq mindettemelerge jáne álemdik naryqtaǵy jaǵdaıǵa qatań sáıkestikte júzege asyrylatyn bolady, - dedi mınıstrlikten.
Qazaqstan OPEK+ kelisimi sheńberinde óz mindettemelerine adaldyǵyn rastady.
Energetıka mınıstri Almasadam Sátqalıev OPEK+ sheńberinde Qazaqstan aldyna qoıylǵan mindettemelerdi tolyq oryndaýǵa nıetti ekenin aıtty.