Qazaqstan OPEK + kelisimi aıasynda munaı óndirýdi arttyrady

NUR-SULTAN. QazAqparat - Búgin beınekonferentsııa formatynda OPEK+ kelisimine qatysýshy elderdiń mınıstrler otyrysy ótti, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

Qazaqstannyń energetıka mınıstri Nurlan Noǵaev óz sózinde atap ótkendeı, búgingi tańda koronavırýstyń taralýyna qarsy kúreste oń dınamıka baıqalyp otyr jáne munaı men munaı ónimderine suranys birtindep qalpyna kelýde.

Kezdesýdiń qorytyndysy boıynsha kelisimge qatysýshy elder munaı óndirýdi qysqartýǵa qatysty qazirgi deńgeıdi 2021 jylǵy sáýirge deıin uzartý týraly sheshim qabyldady. Bul rette, Qazaqstan men Reseı úshin osy kezeńdegi óndiristi sáıkesinshe táýligine 20 jáne 130 myń barrelge kezeń-kezeńmen ulǵaıtýdy kózdeıtin jeke sharttary kelisildi. Osylaısha, OPEK+ sheńberindegi Qazaqstan úshin mindettemeler sáýir aıynda táýligine 1,457 mln barreldi nemese bazalyq deńgeıden -15% quraıdy (táýligine 1,709 mln barr - 2018 jylǵy qarasha deńgeıi).