Qazaqstan Ońtústik-Shyǵys Azııadan eýropalyq naryqqa baǵyttalatyn taýar tranzıtin arttyrýǵa nıetti
Qazaqstan Lıanıýngan teńiz portyndaǵy qazaq-qytaı termınaly arqyly Ońtústik-Shyǵys Azııa elderiniń taýaryn Eýropa men Ortalyq Azııa naryǵyna baǵyttalǵan tranzıtin ulǵaıtýǵa nıetti. Muny Tashkentte (Ózbekstan) ótip jatqan Shanhaı yntymaqtastyq uıymynyń halyqaralyq kólik forýmyna qatysqan QR Kólik vıtse-mınıstri Talǵat Lastaev málim etti, dep habarlaıdy Kazinform agenttiginiń menshikti tilshisi.
Formýda sóz alǵan Talǵat Lastaev Qazaqstan óz aýmaǵyndaǵy halyqaralyq kólik-tranzıttik dálizderdi jetildirýge basa nazar aýdaratynyn atap ótti.
«Qazaqstan kólik tranzıtiniń áleýetin damytýǵa jáne olardy jańǵyrtýǵa úlken kúsh salady. Eýropadan Ortalyq Azııa, Qytaı jáne Ońtústik-Shyǵys Azııa elderine shyǵatyn eń qysqa jol bizdiń elimiz arqyly ótedi. Qazaqstanda 13 halyqaralyq kólik dálizi bar, onyń beseýi temir jol bolsa, segizi avtokólikke arnalǵan», - dep toqtaldy vıtse-mınıstr sóz basynda.
Talǵat Lastaev atap ótkendeı, 2025 jylǵa deıin «Darbaza-Maqtaaral» jobasyn júzege asyrý josparlanǵan. Bul taýar tasymaldaý ýaqytyn qysqartýǵa jáne qazir úlken kúsh túsip turǵan ótkizý pýnktileriniń júktemesin tómendetýge múmkindik beredi.
«Sondaı-aq keleshekte Jetisaı stantsııasyna shyǵý arqyly Saryaǵash ótkizý pýnktiniń júktemesin azaıtý qarastyrylyp otyr. Ózbekstan tarapymen birlesip, Jızaq-Irjar temir jol ýchaskesin jóndeýden ótkizip, Irjar stantsııasynda qosymsha ótkizý pýnktin ashý jobasyn pysyqtap jatyrmyz. Bul joba «Mazarı-Sharıf-Kabýl-Peshavar» dálizi úshin mańyzdy», - dedi Talǵat Lastaev.
Munymen qosa Qazaqstan Ońtústik-Shyǵys Azııa (OShA) elderimen ózara tıimdi yntymaqtastyq máselelerin talqylap jatyr. Elimiz Lıanıýngan teńiz portyndaǵy (Tszıansý provıntsııasy) qazaq-qytaı termınaly arqyly OShA memleketteri taýarlarynyń Eýropa men Ortalyq Azııa naryǵyna tranzıtin ulǵaıtýǵa nıetti.
«Lıanıýngandy Aqtaý portymen ushtastyrý jáne Transkaspıı dálizin jetildirý Eýropa men Azııa arasyndaǵy saýdaǵa oń serpin beredi. Kólik salasynyń ýaqyt óte kele mýltımodaldy bola túsýine oraı Shyǵys-Batys mýltımodaldy kólik baılanysy aldaǵy ýaqytta mańyzdy ról atqarýy múmkin. Bizdiń óńir Eýropa men Shyǵys Azııany baılanystyratyn negizgi aımaq, sondaı-aq ol Qytaıdyń «Bir beldeý - bir jol» jáne Eýropanyń «Global Gateway» bastamalary úshin mańyzdy», - dep atap ótti Talǵat Lastaev.
Kólik forýmy aıasynda birqatar halyqaralyq qujatqa qol qoıyldy. Naqty toqtalsaq, vıtse-mınıstr Talǵat Lastaev «Belarýs – Reseı – Qazaqstan - Ózbekstan - Aýǵanstan - Pákistan» halyqaralyq kólik dálizin qurý jáne damytý týraly ózara túsinistik memorandýmyna qol qoıdy.
Eske sala keteıik, bul kúnderi Tashkent qalasynda avıatsııa salasyndaǵy «Aviation&Logistics Forum – 2023» forýmy jáne «Translogistica Uzbekistan – 2023» kórmesi ótip jatyr. Erteń, ıaǵnı 2 qarashada Ekonomıkalyq yntymaqtastyq uıymy kólik mınıstrleriniń 12-shi kezdesýi ótedi.
