Óńirlerdegi kámpıt pen pechene baǵasy qansha
Kez kelgen toı men basqosý dastarqanynyń sánin keltiretin kámpıt pen pecheneniń qazir túri óte kóp. Kazinform agenttiginiń tilshisi eki kondıterlik ónimniń Qazaqstan óńirlerindegi baǵasyn salystyrdy. Eń arzany men qymbaty qansha teńge?
Qazaqstandyqtardyń kóbi shaıdy shokolad batonchıgimen ishkendi jaqsy kóredi. Osy rette biz baǵany salystyrǵan kezde eń qymbaty men arzany qansha ekenin surap bildik. Óńirlerde baǵa 1 000 teńgeden bastalyp, 7 900 teńgege deıin jetti.
Kontıterlik ónimniń bul túri shynymen de óte kóp. Eń kóp taraǵan shokolad qatarynda «býrevestnık», «lastochka» jáne «vecher» ataýymen satylatyn ónimder bar. Batonchıktiń bul túri Qyzylordada arzan. Munda kelisin 1 000 teńgege satyp alýǵa bolady. Al Shymkent, Túrkistan, Oral men Aqtóbede baǵa sál joǵary. Munda bir kelisi – 1 650-1 700 teńge.
Qonaev, Qaraǵandy, Jezqazǵan, Kókshetaý, Almaty, Atyraý, Semeı men Taldyqorǵanda baǵa ortasha. Munda kelisi 2 000-2 400 teńge aralaǵynda.
Al Astana, Qostanaı, Pavlodar, Petropavl, Óskemen, Tarazda shokolad batonchıginiń baǵasy joǵary bolyp tur. Bul óńirlerde kelisi 2 480-2 685 teńgeden satylyp jatyr.
Al Aqtaýda «býrevestnık» kámpıtiniń kelisi – 3 000 teńge.
Shokolad batonchıginiń eń qymbat túri – «snıkers», «mars», «baýntı» jáne «tvıks». Olardyń baǵasy dúken men bazarlarda 2 700 - 7 900 teńge aralyǵynda.
Eń arzany – Qyzylordada. Munda kelisi 2 700 teńgege satylady. Al eń qymbaty Atyraý qalasynda bolyp shyqty. Atalǵan óńirde kelisi – 7 900 teńge.
Aqtaý, Aqtóbe, Qaraǵandy, Pavlodar, Petropavl, Shymkent, Taraz, Taldyqorǵan men Túrkistanda kópshilik súıip jeıtin shokoladtyń kelisi 4 500-5 500 teńgeden satylady.
Astana, Almaty, Oral, Jezqazǵan, Óskemen, Semeı men Qonaevta kelisi – 5 500-6 000 teńgeden.
Pechene
Mereıtoı, dostarmen basqosý, aǵaıyn-týysty shaqyryp, qýanyshty bólisý keshterinde kóbinde tort, túrli kondıterlik ónimge tapsyrys bergenimen, qazaqstandyqtar shaı ústeline pechene qoıǵandy jaqsy kóredi.
Bul kúnde kámpıt sekildi pecheneniń de túri kóp. Sondyqtan baǵany salystyrý kezinde eń arzany men qymbatynyń baǵasy óńirlerge qansha ekenin bildik. Qaraıym pechenemen qatar shokoladty pechenege de qazir suranys bar.
«Zaıchık» pechenesiniń eń arzany Pavlodar qalasynda satylady. Munda kelisi 680 teńge turady. Al eń qymbaty – Petropavlda. Kelisi – 2 700 teńge.
«Zaıchık» pechenesiniń ortasha baǵasy – 750-1 300 teńge.
Al shokoladty pechene baǵasyna keler bolsaq, kelisi 300-5 000 teńge aralyǵynda.
«Artemon» pechenesiniń eń arzany Qyzylorda qalasynda satylady. Munda kelisi 2 000 teńge turady. Al eń qambaty – Petropavl qalasynda.
Jalpy shokoladty pecheneniń aımaqtardaǵy baǵasy – 3 200-3 950 teńge aralyǵynda.
Infografıkadan Qazaqstan qalalaryndaǵy kondıterlik ónim baǵasyn bilýge bolady.
Buǵan deıin ekzotıkalyq jemis, qııar men qyzanaq baǵasyn bildik.