Qazaqstan óńirdegi energetıkalyq kóshbasshy mártebesin nyǵaıtýǵa umtylady - Sátqalıev
Qazaqstan Ortalyq Azııadaǵy energetıkalyq kóshbasshy mártebesin nyǵaıtýǵa umtylady. Bul týraly XV KazEnergy Eýrazııalyq forýmynda Energetıka mınıstri Almasadam Sátqalıev aıtty, dep habarlaıdy QazAqparat tilshisi.
«Qazaqstan munaı men gazdy iri óndirýshi jáne eksporttaýshylardyń biri sanalady. Halyqaralyq energetıkalyq júıeniń ajyramas býyny bola otyryp, syndarly jahandyq jáne óńirlik energetıkalyq yntymaqtastyqqa járdemdesýge mindettimiz. Elimiz qazirgi álemniń mańyzdy saıası jáne ekonomıkalyq ortalyqtarynyń biri bola otyryp, óńirdegi energetıkalyq kóshbasshy mártebesin nyǵaıtýǵa umtylady. Bul úshin bizde barlyq múmkindikter bar», - dedi Energetıka mınıstri.
Ol energetıkany damytýdyń ekonomıkalyq, áleýmettik jáne ekologııalyq aspektileri arasyndaǵy tepe-teńdiktiń mańyzdylyǵyn túsinetindigimizdi basa aıtty.
«Halqymyzdyń qajettilikterin qanaǵattandyra alatyn jáne sonymen birge qorshaǵan ortaǵa teris áserdi barynsha azaıta alatyn turaqty ári tıimdi energetıkalyq júıeni qurý úshin halyqaralyq áriptestermen yntymaqtastyqqa umtylamyz. Memleket basshysy energetıkalyq kún tártibine, klımattyń ózgerýine qarsy kúres máselelerine jáne tómen kómirtekti ekonomıkaǵa kóshýge erekshe nazar aýdarady», - dedi Almasadam Sátqalıev.
Aıta keteıik, elordada XV KazEnergy Eýrazııalyq forýmy ótip jatyr. Halyqaralyq is-shara qatysýshylaryna Memleket basshysy Qasym-Jomart Toqaev quttyqtaý joldady.
