Qazaqstan ómir súrý uzaqtyǵy boıynsha EYDU elderinen 10 jylǵa qalyp qoıdy - Dúısenova
«Iá, biz qarjylandyrý kólemin arttyrdyq. Eger osydan 5 jyl buryn Qazaqstannyń ár azamatyna 468 teńge tólegen bolsa, qazir ol 1 000 teńgeden asty. Degenmen biz Ekonomıkalyq yntymaqtastyq jáne damý uıymyna múshe elderde bar medıtsınalyq-demografııalyq kórsetkishterge qol jetkize aldyq pa? Joq. Kútilip otyrǵan ómir súrý jasy boıynsha, biz shamamen 10 jylǵa artta qalyp kelemiz. Ana men bala ólimi boıynsha biz boı túzep kele jatqan elderden áldeqaıda artta kelemiz», - dedi mınıstr Astanada ótken «Qazaqstandaǵy densaýlyq saqtaý salasyn reformalaý: ult densaýlyǵyn qorǵaý» atty forýmda.
Dúısenovanyń sózi boıynsha, densaýlyq saqtaý salasyn damytý memlekettik baǵdarlamalarynyń (2005-2015 jyldary) arqasynda Qazaqstanda kútilip otyrǵan ómir súrý jasynyń deńgeıi 70 jasqa kóterildi, al halyqtyń ólim-jitim kólemi 15,3 paıyzǵa kemigen. Ana men bala ólimi 1,8 esege azaıyp otyr.
Mınıstrdiń atap ótýinshe, mınıstrlikke 2016-2019 jyldarǵa arnalǵan QR «Densaýlyq» memlekettik baǵdarlamasy tústi. Ol aldynda júzege asyrylǵan memlekettik baǵdarlamalardyń zańdy jalǵasy jáne densaýlyq saqtaý salasyndaǵy jańa reformalardy tereńdetýge baǵyttalǵan. Jańa memlekettik baǵdarlamanyń negizgi baǵyttarynyń biri - aýrý túrleriniń damýyn aldyn alý jáne eskertý. Osyǵan baılanysty, EYDU elderiniń tájirıbesi men Búkilálemdik bank jáne Dúnıejúzilik densaýlyq saqtaý uıymynyń usynystary boıynsha, sanıtarlyq-epıdemıologııalyq qyzmettiń, salaýatty ómir salty men durys tamaqtaný qyzmetteriniń yqpaldastyǵy negizinde Qazaqstanda Qoǵamdyq densaýlyq saqtaý qyzmeti qurylady.
Sonymen qatar ol, 2018 jyldan bastap, Qazaqstanda barlyq dári-dármekter halyqaralyq standarttarǵa sáıkestendiriledi.
«Biz qazir eýrazııalyq qaýymdastyqpen biryńǵaı farmatsevtıkalyq naryǵyn qurýdamyz. Kelisimge qol qoıar aldynda biz, bir nársege mańyz berdik, atalmysh naryqqa enetin barlyq dárilik quraldar halyqaralyq standartqa sáıkes bolýy shart», - dedi Densaýlyq saqtaý jáne áleýmettik damý mınıstri.
Onyń sózine qaraǵanda, mundaı talap zerthanalyq, klınıkalyq zertteýlerge, kóterme saýda ókilderine, dárihanalarǵa qoıylatyn bolady.
«Mundaı jumystar qazir farmatsevtıkalyq qaýymdastyqtar arqyly júrgizilýde. Menińshe, osyndaı saıasattyń arqasynda biz bıologııalyq qaýipsizdikke, dárilik qamsyzdandyrý sapasynyń jaqsarýyna, tıimdiliginiń artýyna yqpal etedi», - dep túıdi T.Dúısenova.