Qazaqstan oqýshylary Ulybrıtanııada ótken robototehnıka olımpıadasynda rekord ornatty
Bul jeńister oqýshylarǵa álemniń jetekshi ýnıversıtetterine túsýge múmkindik beredi.
Oqýshylarymyz 20 oıynnyń 19-ynda rekordtyq upaımen jeńiske jetti jáne qazylar alqasynyń 3 nomınatsııasyn utyp alyp, jarysta rekord ornatty.
Ulttyq qurama sapynda 15-17 jas aralyǵyndaǵy 12 oqýshy óner kórsetti.
Onyń barlyǵy - robototehnıka boıynsha qazaqstandyq jáne halyqaralyq jarystardyń jeńimpazdary men júldegerleri.
Birinshi «FIRST Tech Challenge – West Midlands» jarysy 28 maýsymda Výlvergemptonda, Ýest-Mıdlends graftyǵynda ótti.
Onda qazaqstandyq oqýshylar 10 oıynnyń 10-ynda jeńiske jetip, úzdik óner kórsetken komandaǵa beriletin bas tóreshi nomınatsııasynyń Judges Award júldesin jeńip aldy.
1 shildede Londonda «FIRST Tech Challenge – South East» ekinshi jarysy ótti.
Oıyndarǵa brıtandyq myqty komandalardan bólek, basqa elderden de kelgen jasóspirimder qatysty.
Onda oqýshylarymyz 10 oıynnyń 9-ynda jeńiske jetip, І oryndy jeńip aldy. Sondaı-aq oqýshylar qazylar alqasynyń eki marapatyna ıe boldy – Judges Award jáne Control Award syılyǵy.
«Bizdiń Ulybrıtanııaǵa saparymyz shynymen de tarıhı sátke toly boldy. Oqýshylarymyzdyń tájirıbeleri básekelesterinen birneshe ese az bolsa da, olar ózderin jaqsy jaǵynan kórsete bildi jáne úzdik nátıje kórsetti. Sonymen qatar FIRST baǵdarlamasynyń jeke qorynda 80 mln dollar stıpendııasy bar jáne robototehnıka chempıonatynyń jeńimpazdary álemniń jetekshi ýnıversıtetterine, sonyń ishinde MIT, Yale jáne basqa da úzdik ýnıversıtetterge tegin oqýǵa ótinish bere alady», - dedi USTEM Robotics Qazaqstandaǵy jáne Ortalyq Azııadaǵy robototehnıka damytý qorynyń negizin qalaýshy Nurdáýlet Dosmaǵambet.
Qazaqstandyq oqýshylar bir aıǵa jýyq ýaqytyn óz mektepteriniń zerthanalarynda ótkizip, robottaryn qurastyrýǵa arnady.
Jas ónertapqyshtar robot bólshekterin ózderi modeldedi, sodan keıin mektep sheberhanalaryndaǵy 3D prınter men lazerlik mashınalarda jobalaryn júzege asyrdy.
«Robototehnıkanyń arqasynda biz álemdi tanýǵa, saıahattaýǵa jáne basqa elderdiń úzdik oqýshylarymen kezdesýge múmkindik aldyq. Ulybrıtanııaǵa jasaǵan bul saparymyz óz qabiletterimizge senimdilik berdi. Biz Anglııa men Soltústik Kıprdiń eń myqty komandalarymen eldiń namysyn qorǵaý úshin jarystyq, al oıyndar arasynda qarsylastarymyzǵa kómektesip te turdyq. Bul bizge qyzyqty boldy, óıtkeni bul jarysqa ekinshi jyl ǵana qatysyp jatyrmyz, biraq ondaǵan jyldar boıy daıyndyq júrgizgen komandalardan jaqsyraq óner kórsettik. Uıymdastyrýshylar men basqa komandalardyń jattyqtyrýshylarynan alǵys sózder estigenimizge qýandyq», - deıdi oqýshy Nurasyl Beısenbaı.
FIRST QR Oqý-aǵartý mınıstrliginiń oqýshylar men muǵalimderdiń qatysýy úshin usynǵan olımpıadalar tizimine engizilgen.
Jyl saıyn FIRST demeýshiligimen 6 men 18 jas aralyǵyndaǵy balalar arasynda túrli jarystar ótkiziledi.
Ár saıystyń taqyryby men tapsyrmalarynyń kúrdeliligi ártúrli.
Tapsyrmalar naqty álemdik máselelerge baılanysty, mysaly, ónerkásiptik avtomattandyrý, taý-ken óndirý, qaldyqtardy óńdeý, ǵaryshty zertteý, bıomedıtsına jáne basqa da mańyzdy taqyryptar.
Foto: instagram.com/oqu_agartu_ministrligi
