Qazaqstan ókilderi BUU-nyń Іshki kólik jónindegi komıtet kezdesýine qatysty

NUR-SULTAN. QazAqparat - QR Indýstrııa jáne ınnovatsııalyq damý mınıstrliginiń ókilderi BUU Eýropalyq ekonomıkalyq komıssııasy Іshki kólik jónindegi komıtetiniń mınıstrlik kezdesýine qatysty. Іs-shara komıssııaǵa qarasty Іshki kólik jónindegi komıtetiniń 75 jyldyǵyna arnaldy, dep habarlaıdy QR SІM baspasóz qyzmeti.

Birikken ulttar uıymy (BUU) Eýropalyq ekonomıkalyq komıssııasynyń (EEK) Іshki kólik jónindegi komıtetiniń 75 jyldyǵyna arnalǵan mınıstrlik kezdesý beınekonferentsııa rejıminde ótti. Jıynǵa AQSh, Reseı, Eýropa Odaǵy, Ortalyq Azııa jáne Taıaý Shyǵys elderi qatysty.

Qazaqstan delegatsııasyna QR Indýstrııa jáne ınfraqurylymdyq damý vıtse-mınıstri B.S.Kamalıev jetekshilik etip, halyqaralyq kólik dálizderin qalyptastyrý jáne júk tasymaldarynyń tıimdiligin arttyrý taqyrybynda baıandama jasady.

Keńes barysynda EEK Іshki kólik jónindegi komıtetine qatysýshy eldermen BUU EEK ishki kólik jónindegi komıtetiniń 75 jyldyǵyna arnalǵan kirispe málimdemeleri men resmı jarııalanymy usynyldy. Qabyldaýshy el - Shveıtsarııa Konfederatsııasy mınıstriniń Іshki kólik jónindegi komıtetiniń ótken jetistikteri jáne ornyqty damýdy qamtamasyz etýdegi bolashaq róli týraly baıandamasy tyńdaldy.

Budan ári ishki kólik baılanysyna járdemdesý jónindegi topta talqylaý bolyp, vıtse-mınıstr B.S. Kamalıev baıandama jasady.

Budan basqa, vıtse-mınıstr BUU EEK Іshki kólik jónindegi komıtetine múshe elderdiń Kólik mınıstrlerin salany odan ári damytý boıynsha elimizde qabyldanyp jatqan sharalar týraly habardar etti. Atap aıtqanda:

- Kaspıı teńizindegi Aqtaý jáne Quryq porttaryn qosa alǵanda, Transkaspıı halyqaralyq kólik baǵdaryn damytý jáne oń nátıjeleri;

- Aqtaý portynda qýaty 100 myń JFB (jıyrma fýttyq balama) asatyn «Konteınerlik hab» qurý jónindegi josparlar;

- 2021 jyldyń qorytyndysynda júkter men konteınerler tranzıtiniń artqany (2021 jyly 1 065,6 myń JFB tasymaldandy, ósim 22%);

– búginde óńirdegi qýatty kólik-logıstıkalyq habqa aınalǵan «Qorǵas-Shyǵys qaqpasy» arnaıy ekonomıkalyq aımaǵyndaǵy qurǵaq portty damytý týraly aıtyp berdi.

Kezdesý qorytyndysynda Іshki kólik jónindegi komıtettiń 75 jyldyǵyn atap ótý jáne «Turaqty ishki kólik pen turaqty damý múddesindegi on jyldyq jetistikterge kirisý» dep atalatyn qarar qabyldandy.