Qazaqstan men Japonııa ınvestıtsııalar salasynda qarym-qatynasty damytýǵa nıetti
Qazaqstandyq delegatsııaǵa QR Investıtsııalar jáne damý vıtse-mınıstri Erlan Haırov basshylyq etti. Sonymen qatar, forýmǵa QR Úkimetiniń, IDM, «Kazakh Invest» UK, oblystyq ákimdik ókilderi, sondaı-aq qazaqstandyq kásipkerler qatysty.
Forým qatysýshylary Qazaqstan - Japonııa bıznes qarym-qatynasy salasyndaǵy jetistikterdiń naqty mysaldaryn, Qazaqstan óńirlerindegi ınvestıtsııalyq múmkindikterdi, Qazaqstannyń ınvestıtsııalyq saıasat máselelerin jáne Japonııamen ekonomıkalyq qatynastardy damytý perspektıvalaryn talqylaýda.
QR Investıtsııalar jáne damý vıtse-mınıstri Erlan Haırov óz sózinde Japonııa Qazaqstannyń Shyǵys Azııadaǵy basty strategııalyq seriktesteriniń biri ekenin atap ótti. Eki el arasyndaǵy qatynastar strategııalyq, dostyq jáne senimge negizdelgen sıpatqa ıe.
«Bizde saýda-ekonomıkalyq yntymaqtastyq boıynsha úkimetaralyq komıssııa jáne iskerlik keńes jumys isteıdi. 2015 jyldan bastap ınvestıtsııalardy kótermeleý jáne ózara qorǵaý týraly kelisim áreket etedi. Budan ózge, japon azamattary úshin Qazaqstanda vızasyz rejım engizilgen. QR men Tokıo, Osaka qalalarynyń arasynda tikeleı áýe qatynasyn ashý boıynsha normatıvtik-quqyqtyq baza quryldy. Osy sharalar iskerlik baılanystardyń belsendendirilýine jáne eki el arasyndaǵy saýda-ekonomıkalyq jáne áleýmettik baılanystardyń damýyna yqpal etýge múmkindik beredi. Japonııa Qazaqstannyń iri ınvestorlarynyń biri. Sońǵy 10 jylda Japonııadan Qazaqstanǵa tikeleı ınvestıtsııalardyń túsimi $5,5 mlrd qurady», - dep málimdedi Erlan Haırov.
Vıtse-mınıstrdiń aıtýynsha, sońǵy 10 jylda ınvestıtsııalyq ahýaldy jaqsartýǵa baǵyttalǵan maqsatty jumystardyń arqasynda, Qazaqstanǵa tikeleı shetel ınvestıtsııalarynyń túsimi shamamen $250 mlrd qurady.
Sonymen birge, vıtse-mınıstr bıyl «bir tereze» qaǵıdasy boıynsha ıdeıalardan bastap júzege asyrylǵanǵa deıin ınvestıtsııalyq jobalardy súıemeldeý boıynsha qyzmetterdiń tolyq spektrin qamtamasyz etetin jáne biryńǵaı úılestirý ortalyǵy retinde áreket etetin, Qazaqstanǵa ınvestıtsııalardy tartýmen aınalysatyn Kazakh Invest ulttyq kompanııasy qurylǵanyn eske saldy.
«Kazakh Invest» UK» AQ basqarma tóraǵasynyń orynbasary Jandos Nurlanov «Sheteldik ınvestorlardy tartýdyń jańa tásili» taqyrybynda prezentatsııasyn qorǵaı otyryp:
«Japonııa tehnologııa jaǵynan neǵurlym damyǵan memleket. Qazaqstan japon kompanııalarymen yntymaqtastyqty nyǵaıtyp, ekonomıkaǵa jańa tehnologııalar men ınvestıtsııalardy tartýǵa nıetti. Búgingi bıznes-forým japon kompanııalarynyń Qazaqstan óńirlerimen tikeleı ınvestıtsııalyq ózara árekettesýine jańa serpin beredi degen senimdemiz», - dedi.
Forým alańynda Japonııa jaqtan saıası jáne qoǵam qaıratkerleri, dıplomattar, sarapshylar, Marubeni Corp, METI, NEC, JOGMEC, Tokyo Rope, NYK Group, JETRO jáne t. b. sııaqty 150-den astam iri japondyq kompanııalardyń basshylary jınaldy. Forýmǵa qatysyp jatqan japon kompanııalary ekonomıkanyń kelesi salalaryn usynady: avtomobıl jasaý, avıatsııa, ǵaryshkerlik, elektronıka, hımııa ónerkásibi, qarjy, jyljymaıtyn múlik, ekspedıtsııalaý jáne júk tasymaldary, taǵam ónerkásibi, densaýlyq saqtaý jáne t.b.
Budan ózge, forým barysynda qazaqstandyq tarap ókilderi kólikke arnalǵan kópqabatty turaq oryndaryn salýǵa mamandandyrylǵan NH Parking kompanııasy, SMBC iri banki, Sojitz, Panasonic, Fujifilm saýda korporatsııalary sııaqty kompanııalarmen jáne uıymdarmen, sondaı-aq, ózge de bıznes qurylymdardyń ókilderimen birqatar V2V kezdesýlerin ótkizip jatyr.
Qazaqstandyq delegatsııa saparynyń baǵdarlamasynda, sondaı-aq, Haneda Pipe Works Co. bolat qubyrlaryn óndirý zaýytyn, «Mitsubishi Materials» korporatsııasyn, NEC álemdegi iri telekommýnıkatsııalyq korporatsııasyn jáne Sumitomo, Itochu, Mitsui sııaqty belgili kompanııalardy aralaý sharalary bar.
Sonymen qatar sapar barysynda taý-metallýrgııa keshenin damytý salasynda elderdiń yntymaqtastyǵyna erekshe nazar aýdaryldy. Osy taqyrypqa bólek shaǵyn forým ótkizý, sondaı-aq, JOGMEC munaı, gaz jáne metaldar boıynsha japon ulttyq korporatsııasynda semınar ótkizý kózdelgen.
Forým qorytyndysy boıynsha oblys ákimdikteriniń Tokio Rope jáne t.b. kompanııalarmen ózara túsinistik týraly memorandým sekildi eki eldiń yntymaqtastyǵy jóninde birqatar qujattarǵa qol qoıý josparlanǵan.
