Qazaqstan men Ulybrıtanııa energetıka salasyndaǵy strategııalyq áriptestikti nyǵaıtady
ASTANA. KAZINFORM – Qazaqstan Respýblıkasynyń Energetıka mınıstri Erlan Aqkenjenov Ulybrıtanııanyń Qazaqstan Respýblıkasyndaǵy Elshisi Ketı Lıch hanymmen kezdesti. Kezdesý barysynda ekijaqty yntymaqtastyqtyń negizgi baǵyttary jáne energetıka sektoryndaǵy ortaq basymdyqtar talqylandy. Bul týraly vedomstvonyń baspasóz qyzmeti málim etti.
Taraptar energetıkalyq ınfraqurylymdy damytý men turaqty energetıkalyq aýysym máselelerine, sondaı-aq jahandyq klımattyq maqsattardy eskere otyryp, energoresýrstardy senimdi jetkizý men aımaqtyq yntymaqtastyqtyń mańyzdylyǵyna erekshe nazar aýdardy.
Ketı Lıch hanym Qazaqstannyń munaı-gaz sektoryn dekarbonızatsııalaý jáne 2060 jylǵa qaraı kómirtegi beıtaraptyǵyna qol jetkizý boıynsha atqaryp jatqan jumysyna joǵary baǵa berdi. Sonymen qatar, Qazaqstannyń Metan boıynsha jahandyq mindettemege qosylýyn jáne «Hydrogen Breakthrough Agenda» bastamasy aıasynda sýtegi energetıkasyn damytý jónindegi qadamdaryn erekshe atap ótti.
Erlan Aqkenjenov jahandyq energetıkalyq máselelerdi sheshýde halyqaralyq áriptestiktiń mańyzdylyǵyn atap ótti. Osy turǵyda ol Qazaqstannyń energııa teńgerimin ártaraptandyrýdaǵy jańartylatyn jáne sýtegi energetıkasynyń rólin erekshe atap ótip, iri ınfraqurylymdyq jobalardy júzege asyrý men ınvestıtsııa tartýdyń mańyzdy ekenin aıtty.
«Biz óz áriptestigimizdi joǵary baǵalaımyz jáne ony odan ári nyǵaıtýǵa nıettimiz. Qazaqstan energetıka sektoryn jańǵyrtyp, kómirqyshqyl gazyn azaıtý sharalaryn júzege asyryp, jahandyq klımattyq bastamalarǵa úles qosýda. Bizde jasyl tehnologııalar men ınvestıtsııalar salasynda birlesip jumys isteý úshin úlken múmkindikter bar, jáne bul yntymaqtastyq eki el úshin de tıimdi bolatynyna senimdimin», – dedi Erlan Aqkenjenov.
Kezdesý barysynda taraptar Ortalyq Azııanyń turaqty damýyn qamtamasyz etý maqsatynda sý-energetıkalyq baǵdarlamalar salasyndaǵy aımaqtyq yntymaqtastyqtyń mańyzdylyǵyn da talqylady.
Eske sala keteıik, buǵan deıin Energetıka mınıstrligi Kaspıı qubyr konsortsıýmy arqyly munaı jóneltýde shekteý joq ekenin habarlaǵan bolatyn.