Qazaqstan men Túrikmenstan Transaýǵan dálizin salady

ASTANA. KAZINFORM – QR Kólik mınıstri Marat Qarabaev Prezıdenttiń resmı sapary aıasynda búgin Ashhabadta qol qoıylǵan kólik salasyna qatysty úkimetaralyq kelisimsharttar týraly pikir bildirdi.

Memleket basshysynyń resmı sapary aıasynda kólik salasynda 4 qujatqa, 2 memorandým jáne 2 úkimetaralyq kelisimge qol qoıyldy.

«Eki memorandýmnyń biri – Qazaqstan jáne Túrikmenstan aýmaǵy arqyly ári qaraı Aýǵanstanǵa qaraı temir jol salý máselesi, Transaýǵan arnaıy kólik dálizin salý. Ekinshisi – Qazaqstannyń ashyq aspan qaǵıdasyn qoldana otyryp, Qazaqstan men Túrikmenstan arasynda tikeleı áýe qatynasyn uıymdastyrý», - dedi M. Qarabaev.

Buǵan deıin eki el arasynda avtokólikpen aýyr júk tasymaldaıtyn kásiporyndar arnaıy ruqsat qujatyn alýy qajet edi. Búgingi úkimetaralyq kelisimge sáıkes, osy arnaıy ruqsat túbegeıli joıylady.

Oǵan qosa, eki mınıstrlik arasynda kólik jáne logıstıka salasyndaǵy strategııalyq yntymaqtastyqty damytý shartyna qol qoıyldy.

Eske sala ketsek, kelissózder qorytyndysy boıynsha Qazaqstan Prezıdenti Qasym-Jomart Toqaev pen Túrikmenstan Prezıdenti Serdar Berdimuhamedov Qazaqstan Respýblıkasy men Túrikmenstan arasyndaǵy dostyqty nyǵaıtý jáne kópjaqty strategııalyq seriktestikti tereńdetý týraly deklaratsııa qabyldady.

Búgin Memleket basshysy Túrikmenstanǵa resmı saparmen bardy.

Qasym-Jomart Toqaev pen Serdar Berdimuhamedov shaǵyn quramda kelissóz júrgizdi.

Sonymen birge, Qazaqstan Prezıdenti men Túrikmenstan Halk Maslahatynyń tóraǵasy Ashhabad tórinde ultymyzdyń uly oıshyly Abaı Qunanbaıulyna arnalǵan eskertkishtiń ashylý rásimine qatysty.