Qazaqstan men Tájikstan prezıdentteri shaǵyn quramda kelissóz júrgizdi
DÝShANBE. KAZINFORM – Qasym-Jomart Toqaev Qazaqstan men Tájikstannyń kópjaqty seriktestiginiń berik negizi sanalatyn joǵary deńgeıdegi turaqty kezdesýlerge basa mán beretinin aıtty. Bul týraly Aqordanyń baspasóz qyzmeti málim etti.
– Eń aldymen, ejelgi tájik jerine tabanym tıgen sátten bastap kórsetken syı-qurmetińiz ben qonaqjaılyq kóńilińiz úshin shyn júrekten rızashylyǵymdy bildiremin. Qazaqstan men Tájikstan arasyndaǵy qarym-qatynas barlyq baǵytta qarqyndy damyp keledi. Biz – senimdi odaqtas eldermiz. Qazaqstan tarapy Tájikstannyń qazaq halqyna degen tileýles nıetin joǵary baǵalaıdy. Biraq munymen toqtap qalýǵa bolmaıdy. Biz alǵa qaraı jyljýymyz kerek. Bul sapar – yntymaqtastyǵymyzdy damytýǵa tyń serpin berýdi kózdeıdi. Búgin Odaqtastyq qatynastar týraly shartqa qol qoıylady. Menińshe, bul qujattyń tarıhı mańyzy zor. Osy oraıda birqatar ózekti másele boıynsha mazmundy pikir almasamyz dep oılaımyn, – dedi Qazaqstan Prezıdenti.
Emomalı Rahmon ekijaqty yntymaqtastyqty joǵary baǵalap, Qazaqstan men Tájikstannyń strategııalyq seriktestigin odan ári nyǵaıtýǵa nıetti ekenin málimdedi.
– Qurmetti Qasym-Jomart Kemeluly, Tájikstanǵa qosh keldińiz! Elimizge memlekettik saparmen kelgenińizge qýanyshtymyz. Bul sapar ekijaqty qarym-qatynasymyzǵa tyń serpin beretinine senimdimin. Saıası, saýda-ekonomıkalyq, mádenı-gýmanıtarlyq jáne qaýipsizdik salalaryndaǵy yqpaldastyǵymyz qarqyndy damyp keledi. Sizben eki el yntymaqtastyǵynyń qazirgi jaı-kúıi men perspektıvasyn, sondaı-aq halyqaralyq jáne aımaqtyq kún tártibindegi máselelerdi talqylaýǵa ázirmin, – dedi Tájikstan Prezıdenti.
Kelissóz barysynda saýda-ekonomıkalyq, kólik-tranzıt, energetıkalyq, mádenı-gýmanıtarlyq yntymaqtastyq, sondaı-aq tsıfrlandyrý, aýyl sharýashylyǵy men sý resýrstary salalaryndaǵy yqpaldastyq máseleleri talqylandy.
Budan bólek, Qazaqstan men Tájikstan ekonomıkasyn damytýǵa tyń serpin beretin ınvestıtsııalyq jobalardy iske asyrýdyń perspektıvalary qarastyryldy.
Qasym-Jomart Toqaev Tájikstan Respýblıkasyna memlekettik saparmen barǵanyn jazǵan bolatynbyz.
