Qazaqstan men Slovakııa sý resýrstary salasynda yntymaqtastyq ornatty
Bul týraly QazAqparat QR Syrtqy ister mınıstrliginiń resmı saıtyna silteme jasap habarlaıdy.
Baspasóz qyzmetiniń málimetterine qaraǵanda, qazaqstandyq taraptan qujatqa (aldyn-ala) Ekologııa, geologııa jáne tabıǵı resýrstar mınıstri Maǵzum Myrzaǵalıev, slovak tarapynan – Qorshaǵan ortany qorǵaý mınıstri ıAn Býdaı qol qoıdy.
Qorshaǵan ortany qorǵaý mınıstrliginde ótken osy qol qoıý rásimine Qazaqstannyń Bratıslavadaǵy Elshisi Roman Vasılenko qatysty.
Atalǵan kelisim Qazaqstan men Slovakııa arasyndaǵy sýdy zertteý salasyndaǵy ǵylymı-tehnıkalyq yntymaqtastyqty nyǵaıtýǵa, transshekaralyq sýlarǵa birlesken monıtorıng júrgizýge, ózara is-qımyl jáne sý resýrstaryna qatysty máseleler boıynsha vedomstvoaralyq, ekijaqty jáne kópjaqty yntymaqtastyq boıynsha tájirıbe almasýǵa múmkindik beredi.
Memorandým sheńberindegi perspektıvalyq yntymaqtastyq is-sharalar birlesken jobalar, aqparat almasý jáne zertteý jumystary túrinde júzege asyrylatyn bolady.
Buryn Slovakııa aýmaǵynda, al búgingi tańda Nur-Sultanda ornalasqan Halyqaralyq sýdy baǵalaý ortalyǵynyń (HSBO) qyzmetin qoldaýdaǵy Slovakııanyń tabysty tájirıbesi aıasynda, sondaı-aq Qazaqstannyń transshekaralyq aǵyn sýlar men halyqaralyq kólderdi qorǵaý jáne paıdalaný týraly Konventsııasynyń bıýrosyna tóraǵalyq etýine baılanysty (Sý konventsııasy), atalǵan memorandým eki tarap úshin de erekshe mańyzdy. Aldyńǵy qatarly eýropalyq tájirıbeni, sý resýrstaryn basqarý men qorǵaýdaǵy ǵylymı-tehnıkalyq ınnovatsııalardy, jerústi sýlarynyń sany men sapasyn, onyń ishinde klımattyń ózgerýi jaǵdaıynda, sondaı-aq, sý resýrstarymen baılanysty basqa da salalardy baqylaý boıynsha ózara is-qımyldy qamtamasyz etý qyzyǵýshylyq týǵyzady.
Memorandýmǵa qol qoıylǵannan keıin, slovak mınıstrimen kezdesýi barysynda Elshi: «elderimiz arasyndaǵy ekologııa salasyndaǵy yntymaqtastyq áleýeti óte aýqymdy jáne bul tek sý resýrstaryn basqarý salasynda ǵana emes», − dep atap ótti.
R. Vasılenko Qazaqstandaǵy qorshaǵan ortany qorǵaýdyń jaı-kúıi, burynǵy Semeı ıadrolyq polıgonyndaǵy ıadrolyq synaqtardyń murasyn eńserý jáne Aral teńiziniń qurǵaýy, Prezıdent Qasym-Jomart Toqaevtyń jáne el úkimetiniń qorshaǵan ortany qorǵaýdy kúsheıtý jáne energııa únemdeıtin «jaýapty ekonomıkany» damytý salasyndaǵy kúsh-jigeri týraly habardar etti.
Jańa Ekologııalyq kodekstiń ázirlengen jobasy men «jasyl» ekonomıkaǵa kóshý tujyrymdamasyn iske asyrýǵa erekshe nazar aýdaryldy. Sonymen qatar, Ortalyq Azııadaǵy sý resýrstaryn basqarý salasyndaǵy tendentsııalar jáne bes memleket arasyndaǵy ózara is-qımyldardyń jaǵdaıy týraly aıtyldy. Osyǵan baılanysty, Slovakııanyń kórshiles eldermen, eń aldymen Dýnaı ózenine qatysty transshekaralyq yntymaqtastyq salasyndaǵy tájirıbesi jáne joǵaryda aıtylǵan sý konventsııasyn júzege asyrý Qazaqstan úshin óte mańyzdy.
Óz kezeginde, ıA. Býdaı suhbat barysynda estigen aqparatty jyly qabyldap, qol qoıylǵan memorandýmdy quptaı otyryp, óz vedomstvosynyń qazaqstandyq áriptestermen ózara tıimdi jáne ózara qyzyqty yntymaqtastyqty odan ári jan-jaqty damytýǵa degen qyzyǵýshylyǵyn rastady.
Seriktestik pen ózara túsinistik kúıde ótken kezdesýdiń qorytyndysy boıynsha suhbattasýshylar jaqyn aradaǵy yntymaqtastyqty nyǵaıtýdyń naqty qadamdaryn belgiledi.
