Qazaqstan men Rýmynııanyń saýda-ekonomıkalyq yntymaqtastyǵy talqylandy
ASTANA. KAZINFORM – QR Syrtqy ister mınıstriniń orynbasary Roman Vasılenko Italııa men Rýmynııanyń Qazaqstandaǵy Elshilerimen kezdesý ótkizdi - dep jazdy Qazaqstan Respýblıkasy Syrtqy ister mınıstrliginiń baspasóz qyzmeti.
Italııa Elshisi Marko Albertımen kezdesýde Memleket basshysynyń jaqynda Rımge jasaǵan resmı saparynyń qorytyndylary talqylanyp, joǵary deńgeıde qol jetkizilgen ýaǵdalastyqtardy júzege asyrý jáne bıylǵy jyly birqatar is-sharalardy ótkizý sharalary belgilendi.
Sonymen qatar, suhbatshylar Qazaqstan – Italııa ekonomıkalyq jáne ónerkásiptik yntymaqtastyq pen almasý jónindegi úkimetaralyq jumys tobynyń kelesi 9-shy otyrysyn ótkizý mańyzdylyǵyn atap ótti.
Rýmynııa Elshisi Madalına Lýpýmen áńgimelesý barysynda QR Premer-Mınıstriniń orynbasary – Syrtqy ister mınıstri Murat Nurtileýdiń 2023 jylǵy jeltoqsandaǵy Býharestke resmı saparynyń qorytyndysy boıynsha ýaǵdalastyqtardy is júzinde iske asyrý máseleleri, sondaı-aq aǵymdaǵy jylǵa arnalǵan birlesken josparlar talqylandy.
Qazaqstan men Rýmynııa arasyndaǵy ekijaqty saýdanyń aıtarlyqtaı kólemin eskere otyryp, R. Vasılenko saýda-ekonomıkalyq jáne ınvestıtsııalyq baılanystardy odan ári keńeıtý qajettigin atap ótti.
Osy turǵyda Saýda-ekonomıkalyq jáne ǵylymı-tehnıkalyq yntymaqtastyq jónindegi Qazaqstan – Rýmynııa úkimetaralyq komıssııasynyń mańyzdy róli atap ótildi. Atalǵan komıssııasynyń 17-shi otyrysy 2024 jylǵy aqpanda Býharestte josparlanǵan.
1) Italııa Qazaqstannyń Eýropadaǵy eń iri saýda seriktesi jáne álemde úshinshi (Reseı Federatsııasy men Qytaıdan keıin) bolyp tabylady. 2023 jyldyń qańtar-qarasha aılarynda taýar aınalymy 14,5 mlrd. dollardy (eksport – 13,4 mlrd., ımport – 1,1 mlrd.) qurady. Italııadan 2005 jyldan bastap 2023 jyldyń birinshi jartyjyldyǵyna deıingi tikeleı sheteldik ınvestıtsııalardyń aǵyny 7,3 mlrd. dollardy qurady. Qazaqstanda ıtalıandyq kapıtaldyń qatysýymen 300-den astam kásiporyn jumys isteıdi.
2) Rýmynııa Qazaqstannyń Ortalyq jáne Shyǵys Eýropa aımaǵyndaǵy jetekshi saýda jáne ınvestıtsııalyq seriktesi bolyp tabylady, Eýropada 5-shi jáne álemde 12-shi orynda.2023 jylǵy qańtar-qarashada ekijaqty saýda kólemi 2,6 mlrd. dollarǵa jetti.
Sońǵy onjyldyqta Rýmynııa QR ekonomıkasyna 1,57 mlrd. dollar ınvestıtsııalady. Qazaqstanda rýmyn kapıtalynyń qatysýymen 37 kompanııa tirkelgen.
Qazaqstannyń eń iri sheteldik aktıvi «QazMunaıGaz Interneshnl» kompanııasy búginde eldegi mańyzdy ınvestorlar men salyq tóleýshilerdiń biri bolyp tabylatyn Rýmynııada jumys isteıdi.
