Qazaqstan men Reseıdiń ózara taýar aınalymy 27 mlrd dollarǵa jetti
Qazaqstan Prezıdenti Qasym-Jomart Toqaev pen Reseı Prezıdenti Vladımır Pýtın Qostanaıda ótip jatqan Qazaqstan men Reseıdiń XIX Óńiraralyq yntymaqtastyq forýmyna beınebaılanys rejıminde qatysyp otyr, dep habarlaıdy Kazinform.
«Osynaý alań 20 jyldyń ishinde óziniń qajettiligi men tıimdiligin kórsetip, Qazaqstan men Reseı arasyndaǵy ózara tıimdi strategııalyq seriktestiktik nyǵaıtýǵa úlken úles qosyp keledi. Jalpy, bizdiń saýda-ekonomıkalyq, ınvestıtsııalyq saladaǵy, ónerkásiptik kooperatsııadaǵy ózara is-qımylymyz jyldan-jylǵa turaqty ósýdi kórsetip otyr. Máselen, ekijaqty taýar aınalymy búginde 27 mlrd dollarǵa jetti. Bul – rekordtyq kórsetkish», - dedi Qazaqstan Prezıdenti.
Memleket basshysynyń dereginshe, Reseıden Qazaqstanǵa tikeleı ınvestıtsııa kólemi 20 mıllıard dollardan asty. Qazaqstanda jumys isteıtin sheteldik qatysýy bar 42 myńnan astam kásiporynnyń jartysyna jýyǵyn, 19 myńyn reseılik kompanııalar qurap otyr.
«Biz ekonomıkanyń barlyq salalarynda – ónerkásipte, aýyl sharýashylyǵynda, kólikte, ınfraqurylymda ózara is-qımyl jasaımyz. Energetıka salasyndaǵy yntymaqtastyqtyń ósip kele jatqan deńgeıin atap ótkim keledi. Reseı gazynyń Qazaqstan aýmaǵy arqyly Ózbekstanǵa tranzıtiniń jaqynda iske qosylýy mańyzdy oqıǵa boldy. Bul joba Ortalyq Azııadaǵy óńirlik turaqtylyq pen energetıkalyq qaýipsizdikti nyǵaıtýda sheshýshi ról atqarady», - dedi Qasym-Jomart Toqaev.
Buǵan deıin Memleket basshysy Qasym-Jomart Toqaev Qazaqstanǵa resmı saparmen kelgen Reseı Prezıdenti Vladımır Pýtındi elorda áýejaıynda qarsy alǵanyn jazǵan edik.
