Qazaqstan men Reseı JOO-larynyń rektorlary kásipkerlik máselelerin talqylady
Oblys ákimi Bolat Baqaýov aýqymdy sharaǵa qatysýshylardyń jumysyna sáttilik tilep, konferentsııanyń mańyzdylyǵyna toqtaldy.
«Elimizdiń JOO rektorlarynyń Ertis-Baıan óńirinde bas qosyp, keńes ótkizýi úlken tarıhı oqıǵa. Pavlodar oblysy qazaq ǵylymyn damytýǵa zor úles qosqan, iri qoǵam qaıratkerleri men akademıkterdi dúnıege ákelgen qasıetti óńir. Ataǵy álemge áıgili Qanysh Sátbaevtan bastap, qazaq ǵylymynyń týyn bıikke kótergen Ermuhan Bekmahanov, Álkeı Marǵulan, Ábiken Bekturov, Shapyq Shókın sııaqty danalar Baıanaýyldyń topyraǵynda týyp-ósken. Qazirgi tańda Otanymyzdyń turaqty damýy men halyqtyń ál-aýqatyn arttyrý boıynsha aýqymdy jobalar tur. Mańyzdy maqsattardyń biri - kásipkerlikti damytý, ásirese, jastardy óz kásibin ashýǵa úıretý. Biz jastardy jalyndy shaǵyn beker ótkizbeı bir ǵylymǵa degen qyzyǵýshylyǵyn oıatyp, óz isiniń jemisin kórýge tárbıeleý kerekpiz. S.Toraıǵyrov atyndaǵy ýnıversıtet osy baǵytta tamasha jetistikterge qol jetkizdi. Alǵash ret elimizde kásipkerlikti damytý mamandyǵyn engizgen JOO-nyń qatarynda. QR Tuńǵysh Prezıdenti Nursultan Nazarbaev Pavlodar oblysyna jasaǵan saparynda ýnıversıtettegi Startup Akademııanyń tusaýyn kesken edi. Sol kezde bastaý alǵan jobalar óńirimizdiń áleýmettik-ekonomıkalyq damýyna óz úlesin qosyp keledi», - dedi Bolat Baqaýov. 
S. Toraıǵyrov atyndaǵy PMÝ-dyń rektory Gaýhar Ahmetova bilim ordasynyń ótken tarıhy men jetken jetistikteri jaıly baıandady.
«Qazirgi tańda aldymyzda jańa strategııalyq maqsattar men mindetter tur. Solardyń biri - kásipkerlikti damytý. Otandyq jáne shekaralas joǵary oqý oryndarynyń rektorlary úshin pikir almasý alańyndaǵy materıaldar men jobalar paıdaly bolady dep úmittenemin. Ýnıversıtettiń irgetasy qalanǵanyna 60 jyldaı ýaqyt ótti. 1960 jyly ındýstrıaldy ınstıtýttyń úsh fakýlteti ǵana bolsa, qazirgi tańda kóp salaly ýnıversıtetke aınaldy. Oqytý 126 bilim berý baǵdarlamasy boıynsha ótedi. Bir jarym jyldyń ishinde bilim alýshylardyń sany 40 paıyzǵa artty. Bizdiń ýnıversıtet memlekettik bilim berý granttary boıynsha aımaǵymyzda kósh bastaıdy. Sońǵy jyldary túlekterdiń jumysqa ornalasý máselesi oń sheshimin taýyp keledi. Máselen, 2018 jyly bul kórsetkish 96 paıyzǵa jetti. 2017 jylmen salystyrǵanda ortasha eńbekaqy 40 paıyzǵa artyp, 97 myń teńgeni qurady. PMÝ ekonomıkanyń barlyq salasy úshin mamandardy daıarlaý memlekettik baǵdarlamalaryn júzege asyrý boıynsha jetekshi JOO-nyń qataryna kiredi», - dedi Gaýhar Ahmetova.
M. Dýlatı atyndaǵy Taraz memlekettik ýnıversıtetiniń rektory Mahmetǵalı Sarybekovtyń aıtýynsha, stýdentterdi kásipkerlikke baýlý, negizgi mamandyqpen birge shaǵyn jáne orta bızneske daıyndaý erekshe oryn alady.
«Mysaly, men Jambyl oblysy ákimdiginiń atynan kásipkerlikti damytý basqarmasy janyndaǵy bıznesti qoldaý komıssııasyn bes jyl basqaryp kelemin. Komıssııa sheshimi boıynsha kásipkerlerge «Bıznestiń jol kartasy 2020» baǵdarlamasy arqyly memlekettik granttar bólinedi. Ókinishke oraı, kóptegen qatysýshylardyń kásipkerlik mádenıeti tómen ekeni baıqalady. Sondyqtan jastar úshin kolledjder men ýnıvesıtetterdiń qabyrǵasynda shaǵyn jáne orta bıznespen aınalysý qajettiligi týyndap otyr», - deıdi Mahmetǵalı Sarybekov.
Omby Memlekettik tehnıkalyq ýnıversıtetiniń rektory Anatolıı Kosyh Reseı úshin Qazaqstan sııaqty kásipkerlik pen ınnovatsııany damytý mańyzdy ról atqaratynyn aıtady.
«Keńes dáýirinde kásipkerlik aıtarlyqtaı damymaǵan edi. Asa úlken emes memlekettik kásiporyndar bolǵan. Bul baǵytta stýdentterdi daıarlaý basqa qaǵıda boıynsha júzege asyrylǵan. Bizdiń ýnıversıtette uzaq jyldar boıy tańdaýly bilim berý fakýlteti jumys isteıdi. Ol jerde stýdentter negizgi bilim berý baǵdarlamasymen qatar qosymsha pánerdi tereńdetilip oqıdy. Onyń ishinde jańa kásipkerlerdi daıyndaımyz. Sondaı-aq, birneshe jyl buryn bıznes fabrıkasy iske qosylǵan», - deıdi Anatolıı Kosyh. 
Aıta keteıik, atalǵan jıynǵa QR JOO rektorlary keńesiniń tóraǵasy Erlan Sydyqov pen elimizdiń ártúrli aımaqtary men kórshiles memleketterdiń JOO-larynan 40 rektor qatysty.
Foto: Valerıı Býgaev