Qazaqstan men Ózbekstan jýrnalısteri úshin baspasóz týry ótedi
ASTANA. KAZINFORM – Qazaqstan men Ózbekstan jýrnalısterge arnalǵan trenıngter men semınarlar ótkizedi jáne jas mamandardy qoldaý men jalǵan aqparatpen birlesip kúresýge ýaǵdalasty. Bul týraly QR Mádenıet jáne aqparat mınıstri Aıda Balaeva Astanadaǵy II Ortalyq Azııa medıaforýmynda aıtty.
Mınıstr Ortalyq Azııa elderiniń medıa salasyndaǵy yntymaqtastyǵy da josparly túrde jańa deńgeıge kóterilip jatqanyn atap ótti.
− Máselen, Qazaqstannyń Mádenıet jáne aqparat mınıstrligi men Ózbekstannyń Aqparat jáne buqaralyq kommýnıkatsııalar agenttigi arasynda 2025 jylǵa deıingi ózara is-qımyl josparyna qol qoıyldy. Jospar medıakontent almasýdy, jýrnalısterge arnalǵan trenıngter men semınarlar ótkizýdi, baspasóz hatshylarynyń biliktiligin arttyrýdy, jas mamandardy qoldaýdy jáne jalǵan aqparatpen birlesip kúresýdi qamtıdy, − dedi A. Balaeva medıaforýmnyń ashylýynda.
Sondaı-aq taraptar tájirıbe almasý jáne kásibı baılanystardy damytý maqsatymen eki eldiń jýrnalısteri úshin baspasóz týrlaryn uıymdastyrý týraly sheshim qabyldady.
Qazaqstan mınıstri Ortalyq Azııanyń barlyq elin osy protseske qatysýǵa shaqyrdy.
Óz kezeginde Ózbekstan Aqparat jáne buqaralyq kommýnıkatsııalar agenttiginiń dırektory Asadjon Hodjaev Ortalyq Azııa elderiniń aqparat mınıstrleri turaqty kezdesip turatyn mehanızmdi nyǵaıtý qajettigin jetkizdi.
Aıta keteıik, 16-17 sáýir kúnderi Ortalyq Azııa boıynsha medıa salasynyń mamandary Astanadaǵy forýmda bas qosady. Bıylǵy forým «Jahandyq ózgerister dáýirindegi Ortalyq Azııa. Strategııalyq damý quraly retindegi medıa» dep atalady.
Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.