Qazaqstan men Ózbekstan arasyndaǵy taýar aınalymy 600 mln dollarǵa jaqyndady

TAShKENT. KAZINFORM – Bıylǵy eki aıdyń qorytyndysy boıynsha da Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń Tashkenttegi menshikti tilshisi.

Ózbekstan Statıstıka agenttiginiń málimetinshe, qańtar-aqpan aılarynda eldegi syrtqy saýda aınalymy 9,9 mlrd dollarǵa teńelip, byltyrǵy kezeńmen salystyrǵanda 10,5%-ǵa ósti.

Búgingi tańda Ózbekstan álemniń 151 elimen saýda-sattyq jasaıdy. Eki aıdyń qorytyndysy boıynsha, eldiń basty saýda serikteri kóshin Qytaı bastap tur. Eki memeleket arasyndaǵy taýar aınalymy 2,1 mlrd dollarǵa (jalpy kólemniń 21,5%) jetti.

Odan keıingi orynda saýda-sattyqtyń 17,8% úlesi tıesili Reseı tur. Bul elmen aradaǵy ımport-eksport kólemi 1,76 mlrd dollar boldy.

Sonymen qatar, kóshbasshylardyń úshtigin Qazaqstan túindedi. Bizdiń el men Ózbekstan arasyndaǵy taýar aınalymy 581 mln dollarǵa (jalpy kólemeniń 5,9%) jetti.

Kórsetilip otyrǵan kezeńderde Ózbekstan Qazaqstanǵa 166,2 mln dollardyń taýaryn eksporttap, 415,3 mln dollardyń taýaryn ımporttaǵan.

Eske salaıyq, Qazaqstan byltyr da Ózbekstannyń eń iri saýda seriktesteriniń úshtigine engen edi.