Qazaqstan men Ózbekstan arasyndaǵy saýda-sattyq kólemi $1,9 mlrd asty

TAShKENT. KAZINFORM – Alǵashqy jartyjyldyqtyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Qańtar-maýsym aılarynda eldegi syrtqy saýda aınalymy 31,8 mlrd dollarǵa jetip, byltyrǵy kezeńmen salystyrǵanda 8,5%-ǵa ósti. Ózbekstan Statıstıka agenttiginiń aqparatyna saı, búgingi tańda kórshiles memleket álemniń 186 elimen saýda-sattyq jasaıdy.

Jarty jyldyń qorytyndysy boıynsha eldiń basty saýda seriktesteri kóshin Qytaı bastap tur. Eki memeleket arasyndaǵy taýar aınalymy 5,8 mlrd dollardan (jalpy kólemniń 18,5%) asty. Odan keıingi orynda saýda-sattyqtyń 18,1% úlesi tıesili Reseı tur. Bul elmen aradaǵy ımport-eksport kólemi 5,7 mlrd dollardan artyq.

Sonymen qatar, kóshbasshylardyń úshtigin Qazaqstan túıindedi. Bizdiń el men Ózbekstan arasyndaǵy taýar aınalymy 1,9 mlrd dollardan asty (jalpy kólemniń 6%).

«Qazaqstan Qytaı men Reseıden keıingi Ózbekstannyń eń iri syrtqy ekonomıkalyq seriktesteriniń birine aınaldy. Buǵan ortaq shekaranyń bolýy, TMD aıasynda erkin saýda jasaý, sondaı-aq ózara ekonomıkalyq qatynastardy júıeli jolǵa qoıý yqpal etti», - delingen Statıstıka agenttiginiń derekterinde.

Qamtylyp otyrǵan kezeńde Ózbekstan Qazaqstanǵa 619,8 mln dollardyń taýaryn eksporttap, 1,2 mlrd dollardyń taýaryn ımporttaǵan.