Qazaqstan men Ońtústik-shyǵys Azııada bolǵan jer silkinisiniń baılanysy bar ma
ALMATY. KAZINFORM — Búgin álemniń túkpir-túkpirinde jer silkinisi boldy. Kazinform tilshisi seısmolog Muhtar Haıdarovtan jer dúmpýiniń ózara baılanysy týraly surady.
28 naýryzda Astana ýaqytymen 03:42–de Almatydan 323 shaqyrym jerde jer silkinisi tirkeldi. Qarqyndylyǵy Merkide 5 ball, Qulan aýylynda 4 ball boldy. Onyń áserinen Turar Rysqulov aýdanynda 20-dan astam ǵımarat zaqymdandy.
Astana ýaqytymen 16:00–de Jambyl oblysynda taǵy da jer silkindi. Bul jer dúmpýiniń oshaǵy Qyrǵyzstan aýmaǵynda boldy.
28 naýryz kúni Astana ýaqytymen 11:20–da Mıanmada 7,9 baldyq jer silkinisi tirkeldi. Sondaı-aq silkinis dúmpýi Taıland astanasy Bangkok pen Laos astanasy Ventıanda da anyq baıqalǵan. Jalpy Mıanmadaǵy jer silkinisinen 50 adam qaza taýyp, 300 adam jaraqat aldy.
Seısmolog Muhtar Haıdarov bul jer silkinisteriniń arasynda tikeleı baılanys joq ekenin atap ótti. Aıtýynsha, bul oqıǵalardy tek lıtosferalyq taqtalar arqyly baılanystyrýǵa bolady.
— Eýrazııalyq taqta men Úndistan taqtasy Gımalaı taýlary arqyly qabattasqan. Bul taýlardyń bizdegi bir sheti — Tıan-Shan, ekinshi sheti — Mıanma jaqta aıaqtalady. Búgin bolǵan jer silkinisterin osy ǵana baılanystyrady. Al Mıanmada bolǵan jer dúmpýiniń bizge tikeleı áseri boldy ne bolashaqta bolady deýge ǵylymı negizdeme joq, — dedi ol.
Eske salaıyq, buǵan deıin jer silkinisine baılanysty úkimettik jumys toby Jambyl oblysyna jiberilgenin jazǵanbyz.
Sondaı-aq Prezıdentke Jambyl oblysyndaǵy jer silkinisinen keıingi ahýal baıandalǵanyn jazǵan edik.