Qazaqstan men Nıderland ýnıversıtetiniń ǵalymdary birlesip Qańly murasyn zerttep jatyr
ShYMKENT. KAZINFORM — Ózbekáli Jánibekov atyndaǵy Ońtústik Qazaqstan pedagogıkalyq ýnıversıtetiniń Arheologııalyq ortalyǵy Nıderlandtyń Leıden ýnıversıteti ǵalymdarymen birlesip qazba jumystaryn júrgizdi. Bul týraly Ǵylym jáne joǵary bilim mınıstrligi málim etti.
Vedomstvonyń málimetinshe, halyqaralyq ǵylymı yntymaqtastyq aıasynda Túrkistan oblysy, Ordabasy aýdany, Qaraspan aýyly mańynda ornalasqan Tólebaıtóbe-2 qorymdary zertteldi.
— Qazba jumystary barysynda b. z. d. I ǵasyr men b. z. IV ǵasyryna jatatyn Qańly kezeńine tán obalar arshyldy. Oba ishinen aqsúıek kóshpendi jaýyngerdiń jerlengeni anyqtaldy. Bul — qabirden tabylǵan jebe ushtary, turmystyq pyshaq, at ábzelderi (aýyzdyq), beldik toǵalary men áshekeı buıymdar arqyly dáleldenip otyr. Erekshe nazar aýdararlyǵy — úlken hum ydysynyń bólikteri qabir ishine tóselgen jáne máıit aǵash tabyttyń ústine qoıylyp jerlengen. Aǵashtyń jaqsy saqtalǵan bólikteri men jebelerdiń sabyndaǵy jip izi jerleý rásiminiń kúrdeliligin kórsetedi. Alebastr gıpsten jasalǵan boıtumarlar sol zamandaǵy nanym-senim boıynsha zulym kúshterden qorǵaýshy retinde qoıylǵan. Sondaı-aq jylqynyń azý tisi, kelesi obadan tómen temperatýrada baǵaly metalldardy balqytýǵa arnalǵan, ǵylymı aınalymda «tıgel» dep atalatyn sırek kezdesetin keramıkalyq ydys tabyldy. Bul — sol kezeńdegi metall óńdeý tehnologııasyna qatysty mańyzdy jańalyq, — delingen habarlamada.
Aıta keterligi, obalar ejelgi dáýirde birneshe ret tonalǵanyna qaramastan búgingi qazba jumystary nátıjesinde mańyzdy derekter men jádigerler tabylyp otyr. Zertteý jumystaryna arnaıy memorandým aıasynda «Ordabasy» ulttyq tarıhı-mádenı qoryq-mýzeıiniń qyzmetkerleri de qatysty.
Leıden ýnıversıtetiniń antropolog jas ǵalymy Polına Kolmogorova bul zertteý jumystary Qazaqstannyń kóne tarıhynyń ashylýyna, Qańly kezeńiniń mádenıeti men salt-dástúrin tanýǵa úles qosatynyna senim bildirip, arheologııalyq zertteýlerdi aldaǵy ýaqytta da jalǵastyrmaq.
Eske sala keteıik, buǵan deıin almatylyq arheologter saq dáýirine tıesili altyn júzik tapqan edi.