Qazaqstan men Marokko qylmys jasaǵan adamdardy bir-birine ustap beredi
ASTANA. KAZINFORM — Májilis «Qazaqstan Respýblıkasy men Marokko Koroldigi arasyndaǵy ustap berý týraly kelisimdi ratıfıkatsııalaý týraly» zańdy qabyldady.
— Qazaqstan Respýblıkasy men Marokko Koroldigi arasyndaǵy ustap berý týraly kelisim taraptardyń aýmaqtarynda qylmystyq jaýaptylyqqa tartý nemese sot úkimin oryndaý úshin belgilengen adamdardy ekstradıtsııalaý máseleleri boıynsha eki eldiń quzyretti organdary arasyndaǵy qatynastardy retteýge baǵyttalǵan. Atalǵan kelisim 2024 jylǵy 12 jeltoqsanda Rabat qalasynda jasaldy. Bul kelisimge sáıkes, taraptar ózderiniń aýmaqtarynda qylmys jasaǵany úshin anyqtalǵan adamdardy odan ári qylmystyq jaýapkershilikke tartý nemese sot úkimin oryndaý úshin bir-birine ustap berýge mindettenedi, — dedi Jarqynbek Amantaıuly.
Onyń aıtýynsha, kelisimde adamdardy ustap berý jáne odan bas tartý úshin naqty negizder kózdeledi. Ustap berý úshin keminde 1 jyl merzimge bas bostandyǵynan aıyrý túrindegi jaza nemese taraptardyń zańnamasyna sáıkes neǵurlym qatań jaza kózdeletin qylmystyq is jasaý negizgi shart sanalady.
— Bul rette sot úkimin oryndaý maqsatynda ustap berý, eger suraý salý kelip túsken sátte jazanyń ótelmegen merzimi keminde alty aıdy quraǵan jaǵdaıda júzege asyrylady, — dedi ol.
Depýtattyń málimetinshe qos taraptyń osy kelisimdi iske asyrýǵa jaýapty quzyretti organdary mynalar:
Qazaqstannan — Bas prokýratýra;
Marokko Koroldiginen — Ádilet mınıstrligi.
— Marokko Koroldigimen Qazaqstan arasynda túrli saladaǵy qarym-qatynas jandanyp keledi. Taıaýda Qazaqstan-Marokko iskerlik keńesi quryldy. Aýylsharýashylyq salasynda saýda kólemi arta tústi. Sonymen qatar, ǵylym-bilim salysanda da biraqatar kelisimder jasalýda. Sondyqtan, bul kelisimder eki eldiń de múddesine saı jáne zor mańyzǵa ıe bolmaq, — dedi Májilis depýtaty.
Aıta keteıik, palatanyń búgingi jalpy otyrysynda elden zańsyz shyǵarylǵan qarajatty qaıtarýǵa yqpal etetin zań qabyldandy.