Qazaqstan men Qytaıda eki eldiń Mádenıet ortalyqtary ashylady

BEIJІŃ. QazAqparat – Qytaıda Qazaqstan Mádenı ortalyǵy ashylady. Óz kezeginde Qazaqstanda da Qytaıdyń osyndaı ortalyǵy qyzmet kórsetetin bolady. Mundaı kelisim Beıjińde Qazaqstan elshisi Shahrat Nuryshevtiń QHR Mádenıet jáne týrızm mınıstri Hý Hepınmen kezdesýinde qol jetkizildi, dep habarlaıdy QazAqparat.

Kezdesýde taraptar mádenı-gýmanıtarııa salasyndaǵy baılanysty odan ári nyǵaıtý jáne týrızmdi damytý máselelerin talqylady.

Sh.Nuryshev jaqyn ýaqytta turaqty avıareıster qaıta usha bastaıtynyn jáne onymen adamdar baılanysynyń belsendi bola túsetinin eskerip, ekijaqty dıalogty jandandyrýdyń qajettigine nazar aýdardy.

Qazaqstan elshisi Qazaqstanda jáne Qytaıda ózara mádenı ortalyqtardy qurý bul baǵyttaǵy ekijaqty qatynastyń damýyna serpin beretinin atap ótti.

Sonymen qatar dıplomat Qytaı mınıstrin Qazaqstannyń týrıstik múmkindikteri jáne QR Úkimetiniń Týrızm salasyn damytýdyń 2025 jylǵa deıingi memlekettik baǵdarlamasyn júzege asyrý boıynsha sharalarymen tanystyrdy.

Budan bólek elshi Qazaqstannyń QHR azamattaryna 14 kúnge deıin vızasyz júrý múmkindigin berý josparyn eskerip, QR azamattary úshin de uqsas jaǵdaı jasaý máselesin kóterdi.

Óz kezeginde Hý Hepın Qazaqstan men Qytaı arasyndaǵy mádenıet jáne týrızm salasyndaǵy yntymaqtastyqtyń zor keleshegi bar ekenin erekshe atap ótti. Ol jyl sońynda josparlanǵan Qazaqstan-Qytaı yntymaqtastyǵy jónindegi komıtetiniń Mádenı-gýmanıtarlyq yntymaqtastyq jónindegi kishi komıtetiniń 15-shi otyrysy eki el arasyndaǵy mádenı-gýmanıtarııa baǵytyndaǵy baılanystardy nyǵaıtýda mańyzdy ról atqaratynyna senim bildirdi.

Sonymen birge QHR Mádenıet jáne týrızm mınıstri Qazaqstan Úkimetiniń eldiń týrıstik áleýetin damytý boıynsha qabyldap jatqan sharalaryn joǵary baǵalady, sondaı-aq qytaılyq taraptyń mádenıet ortalyqtaryn ózara qurýǵa daıyn ekenin bildirdi.