Qazaqstan men Qytaı avtomobılmen júk tasymalyn jasaý blankterimen almasty

ASTANA. QazAqparat - Búgin Qazaqstan men QHR arasynda 2017 jyly avtomobılmen júk tasymaldaryn jasaýǵa ruqsat beretin qosymsha blanktermen almasty, dep habarlaıdy QR IDM baspasóz qyzmeti Feısbýktegi paraqshasynda.

"Eki el ótkizý beketteri aýdanynda shekara boıyndaǵy termınaldar aralyǵynda júkterdi tasymaldaýǵa ary-beri bir ret júrip ótýge múmkindik beretin 10 myń S túrindegi ruqsattamalarmen almasty" delingen habarlamada.

Sondaı-aq, eki jaqqa bir sapar jasaý quqyǵy bar belgili baǵdarlarmen júk tasymaldaýǵa 1 myń D túrindegi ruqsattama berilgen. D túrindegi ruqsattama bul ruqsattamalardyń jańa túri ekenin atap ótken jón. Vedomstvonyń baspasóz qyzmeti taratqan málimetke súıensek, ol qazaqstandyq tasymaldaýshylarǵa Qytaıdan tómende atalǵan jańa baǵdarlarmen júkterdi jetkizýge múmkindik beredi:

Almaty - Qorǵas - Úrimshi;

Almaty - Dostyq - Úrimshi;

Almaty - Qorǵas - Inın;

Taldyqorǵan - Qorǵas - Úrimshi;

Shonjy - Dostyq - Inın;

Óskemen - Maıqapshaǵaı - Úrimshi;

Semeı - Baqty - Úrimshi;

Semeı - Maıqapshaǵaı - Altaı;

Zaısan - Zımýnaı.