Qazaqstan men Kýba arasyndaǵy ekijaqty yntymaqtastyq máseleleri talqylandy

NUR-SULTAN. QazAqparat - Qazaqstannyń Kanadadaǵy jáne Kýbadaǵy mindetin qosa atqarýshy Elshi Aqylbek Kamaldınovtyń Kýbanyń Syrtqy ister mınıstriniń Birinshi orynbasary Marselıno Medınamen kezdesýi ótti, dep habarlaıdy QR SІM baspasóz qyzmeti.

Kelissózder barysynda taraptar Qazaqstan – Kýba ekijaqty yntymaqtastyǵyn odan ári damytýdyń jaı-kúıi men basymdyqtaryn talqylady. Kezdesý barysynda taraptar elderimiz arasyndaǵy saıası dıalogtyń údemeli sıpatyn atap ótti.

Elshi suhbattasýshysyn Qazaqstannyń aǵymdaǵy áleýmettik-ekonomıkalyq damýymen tanystyrdy. Sonymen qatar, A. Kamaldınov ekonomıkalyq ózara is-qımyldyń, onyń ishinde farmatsevtıka jáne týrızm salasyndaǵy perspektıvalyq baǵyttaryn belgiledi. Prezıdent Qasym-Jomart Toqaevtyń basshylyǵymen júrgizilip jatqan Qazaqstannyń saıası júıesiniń reformalaryna erekshe nazar aýdaryldy. Óz kezeginde Mınıstrdiń birinshi orynbasary Elshini eldegi qazirgi saıası jáne ekonomıkalyq jaǵdaımen tanystyrdy. Qazaqstannyń Kýbaǵa qatysty buljymas ustanymyn qanaǵattanarlyqpen atap ótip, dıplomatııalyq mıssııanyń mártebesin Elshilik deńgeıine kótergeni úshin Qazaqstan basshylyǵyna rızashylyǵyn bildirdi.