Qazaqstan men Koreıa Syrtqy ister mınıstrleri qandaı máselelerdi talqylady

ASTANA. QazAqparat - Astana men Seýl arasynda ózekti halyqaralyq máselelerge qatysty ustanymdary uqsas. Bul týraly búgin Koreıa Respýblıkasynyń Syrtqy ister mınıstri Kan Gen Hvamen kezdesýden keıingi birlesken málimdeme jasaý barysynda QR Syrtqy ister mınıstri Qaırat Ábdirahmanov aıtty, dep habarlaıdy QazAqparat.

«Kezdesý barysynda biz ekijaqty yntymaqtastyqtyń ózekti máseleleri men halyqaralyq kún tártibiniń, onyń ishinde Koreı túbegindegi ahýaldy, sondaı-aq saıası-ekonomıkalyq, áleýmettik jáne basqa da ózara qarym-qatynastardy damytý perspektıvalary týraly áńgimelestik. Qazaqstan Respýblıkasy Shyǵys Azııadaǵy negizgi strategııalyq áriptesterdiń biri bolyp tabylatyn Koreıa Respýblıkasymen yntymaqtastyqty jan-jaqty damytýǵa erekshe mán beredi», - dep atap ótti mınıstr.
 

Osy rette ol 2016 jyldyń qarasha aıynda Prezıdent Nursultan Nazarbaevtyń Seýlge jasaǵan memlekettik sapary eki eldiń arasyndǵy yntymaqtastyqtyń jańa betterin ashqanyn basa aıtty.

«Qazirgi tańda Astana men Seýl arasynda ózekti halyqaralyq máselelerge qatysty ustanymdarymyzdyń uqsastyǵy baıqalyp otyr. Ony erekshe atap ótkim keledi. Halyqaralyq uıymdar men kópjaqty forýmdar aıasynda ózara jaǵymdy is-qımyldar ósip keledi. Búgingi kelissózder ortaq maqsattardyń bar ekendigin taǵy da bir márte dáleldedi jáne elderimizdiń kóptegen salalardaǵy yntymaqtastyǵyn tereńdetýge ózara qyzyǵýshylyqty taǵy da rastady», - dedi Qaırat Ábdirahmanov.
 

Sonymen qatar mınıstr Qazaqstan Koreıa Respýblıkasymen dostyq pen ózara qarym-qatynas rýhyna negizdelgen oń jáne berik qarym-qatynastardy damytýdy jalǵastyratyndyǵyn aıryqsha atady.

«Osy jan-jaqty damýdy bizdiń halyqtardymyzdyń ıgiligi úshin saqtap qalýǵa barlyq kúsh-jigerdi jumsaıtyn bolamyz», - dedi ol.
  Ekijaqty kezdesý barysynda saýda-ekonomıkalyq ózara is-qımyl máseleleri qaralyp, ótken jyly eki eldiń arasyndaǵy taýar aınalymy kórsetkishteriniń qalpyna kelgendigi qanaǵattanýshylyqpen atalyp ótildi.
«Ekijaqty ınvestıtsııalyq-ekonomıkalyq baǵyttaǵy oń trendter de ataldy. Onyń ishinde Úlken Almaty aınalma avtokólik joly qurylysy jobasyn qosa alǵanda kólik-logıstıkalyq sala da bar. Munan bólek, biz aqparattyq-kommýnıkatsııalyq tehnologııalar, tsıfrlandyrý jáne tórtinshi ónerkásiptik revolıýtsııanyń ózge de salalaryndaǵy ózara is-qımyldy damytý boıynsha eki eldiń vedomstvolary men túrli ınstıtýttary arasyndaǵy yntymaqtastyqty jandandyrýǵa ýaǵdalastyq», - dedi Qaırat Ábdirahmanov.