Qazaqstan men Koreıa atom energetıkasy jobalaryn birlesip damytýǵa nıetti
ASTANA. KAZINFORM — Qazaqstan men Koreıa Respýblıkasy atom energetıkasy jobalaryn iske asyrý salasyndaǵy yntymaqtastyqty nyǵaıtyp jatyr, dep habarlaıdy QR Atom energııasy jónindegi agenttigi.
QR Atom energııasy jónindegi agenttiginiń tóraǵasy Almasadam Sátqalıev Koreıa Respýblıkasyna jumys sapary barysynda Koreıa Respýblıkasynyń memlekettik organdarynyń ókilderimen jáne jetekshi koreı kompanııalarynyń basshylyǵymen birqatar ekijaqty kezdesýler ótkizdi.
Atap aıtqanda, Koreıa Respýblıkasynyń Klımat, energetıka jáne qorshaǵan orta mınıstrliginiń basshylyǵymen, Korea Hydro & Nuclear Power (KHNP) jáne Doosan Enerbility kompanııalarynyń, sondaı-aq Koreıa Respýblıkasynyń ózge de iri kompanııalarynyń ókilderimen kezdesýler ótti.
— Kelissózder atom energııasyn beıbit maqsatta paıdalaný salasyndaǵy strategııalyq yntymaqtastyqty tereńdetýge, tehnologııalyq áriptestikti damytýǵa, sonymen qatar ónerkásiptik jáne ınvestıtsııalyq kooperatsııany keńeıtýge baǵyttaldy. Koreıa Respýblıkasynyń memlekettik organdarynyń ókilderimen kelissózder barysynda qazaqstandyq tarap iske asyrylyp jatqan ınstıtýtsıonaldyq reformalardy jáne memlekettik basqarý men retteýdiń qazirgi zamanǵy júıesin qalyptastyrýdy qosa alǵanda, atom salasyn damytý jónindegi memlekettik saıasattyń basym baǵyttaryn usyndy, — delingen habarlamada.
Taraptar ıadrolyq jáne radıatsııalyq qaýipsizdikti qamtamasyz etý tásilderin, sondaı-aq memlekettik retteý jáne salalyq basqarý salasynda tájirıbe almasý múmkindikterin talqylady.
Sapar barysynda atom elektr stantsııalaryn salý jobalaryn iske asyrý jáne joǵary tehnologııalyq óndiristerdi damytý baǵytynda aıtarlyqtaı halyqaralyq tájirıbege ıe jetekshi koreı kompanııalarymen ózara is-qımylǵa erekshe nazar aýdaryldy.
Qazaqstan aýmaǵynda jabdyqtar men jekelegen komponentter óndirisin oqshaýlaý, sondaı-aq qazaqstandyq kásiporyndardy jobany iske asyrýdyń óndiristik jáne tehnologııalyq tizbekterine tartý múmkindikterin qosa alǵanda, ónerkásiptik kooperatsııany damytý máseleleri qaraldy. Talqylaýdyń jeke baǵyty atom salasy úshin kadrlyq áleýetti daıarlaý jáne damytý boldy.
Taraptar mamandar daıarlaý, bilim berý baǵdarlamalaryn damytý jáne ıadrolyq energetıka salasyndaǵy uzaq merzimdi jobalardy iske asyrý úshin qajetti kásibı quzyrettermen almasý baǵytyndaǵy yntymaqtastyq múmkindikterin qarastyrdy. Kezdesýler qorytyndysy boıynsha taraptar atom salasyn damytý baǵytynda Qazaqstan men Koreıa Respýblıkasy arasyndaǵy áriptestikti odan ári damytýǵa, ınstıtýtsıonaldyq dıalogty nyǵaıtýǵa jáne praktıkalyq ózara is-qımyldy keńeıtýge ózara múddeli ekenin rastady.
Osydan buryn «ıAdrolyq tehnologııalar parki» Atom energııasy jónindegi agenttiktiń qaramaǵyna ótkenin jazdyq.