Qazaqstan men Qytaıdyń ımport-eksport qarqyny qandaı
ASTANA. KAZINFORM – 2025 jyldyń alǵashqy toqsanynda Qazaqstannyń Qytaımen jáne Ortalyq Azııa elderimen taýar aınalymy 29,3 mlrd dollarǵa jetti, Qytaıdan ımport kólemi 18%-ǵa ósti. Bul týraly «Atameken» ulttyq kásipkerler palatasynyń tóralqa tóraǵasy Raıymbek Batalov «Ortalyq Azııa — Qytaı» iskerlik keńesiniń otyrysynda aıtty.
Onyń aıtýynsha, Qazaqstan, Qyrǵyzstan, Ózbekstan, Tájikstan jáne Túrikmenstan jańa óńirlik yntymaqtastyq arhıtektýrasyn qalyptastyrýda mańyzdy ról atqarady. Árbir el tranzıttik dálizderdi damytý, eksportqa baǵyttalǵan salalar men birlesken óndiristik tizbekterdi qurý sııaqty ortaq ekonomıkalyq kún tártibine óz úlesin qosyp keledi.
− Osy jaǵdaıda Qytaı senimdi saýda-ekonomıkalyq áriptes qana emes, tehnologııalyq qozǵaýshy kúsh, ınvestıtsııalyq seriktes jáne strategııalyq odaqtas bolyp otyr. 2024 jyly Qazaqstan men Qytaı arasyndaǵy taýar aınalymy 43,82 mlrd AQSh dollary boldy. Onyń ishinde eksport 15,8 mlrd, al ımport — 28 mlrd dollar. Bul kórsetkishter eki el arasyndaǵy ekonomıkalyq strategııany aıqyn kórsetedi, − dedi kásipkerler palatasynyń tóraǵasy.
Al 2025 jyldyń alǵashqy toqsanynda Qytaımen jáne Ortalyq Azııa elderimen saýda baılanystarynyń belsendi damýy baıqaldy. Jalpy taýar aınalymy shamamen 29,3 mlrd dollarǵa jetse, Qytaıdan ımport kólemi 18%-ǵa ósti.
− Eksport qurylymynda — munaı, mys, ýran, metallýrgııa ónimderi jáne sońǵy kezde óńdelgen aýyl sharýashylyǵy ónimderi basym. Al ımporttaǵy jaǵymdy ózgeristerdiń biri — joǵary tehnologııalyq jabdyqtar, esepteý tehnıkasy, qurylys tehnıkasy men tsıfrlyq transformatsııaǵa qajetti komponentterdiń úlesi artyp keledi. Munyń bári Ortalyq Azııa elderiniń shıkizattyq modelden tereń kooperatsııaǵa negizdelgen damý úlgisine kóship jatqanyn kórsetedi, − dedi Raıymbek Batalov.
Aıta keteıik, búgin elordada «Ortalyq Azııa — Qytaı» ІІ sammıti ótip jatyr. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysady.
Eń alǵashqy sammıt 2023 jyldyń 19 mamyrda Qytaıdyń Sıan qalasynda ótken edi. Sammıt qorytyndysynda Memleketter basshylary Sıan deklaratsııasyna qol qoıyp, birqatar bastamany qabyldaǵan.
Sonymen birge, Ortalyq Azııanyń organıkalyq ónimderi Qytaı naryǵynda joǵary baǵalanady.