Qazaqstan men Qytaı sheteldik ruqsat blankilerin elektrondy formatta almasýdy bastady
ASTANA.KAZINFORM - Qytaı Halyq Respýblıkasymen sheteldik ruqsat blankisin almasý budan bylaı elektrondy formatta júzege asady. Bul týraly QR Kólik mınıstrliginiń Avtomobıl kóligi jáne kóliktik baqylaý komıteti habarlady.
Sheteldik ruqsat blankisi (ShRB) - tasymaldaýshylarǵa júkpen shetelge shyǵýǵa múmkindik beretin arnaıy qujat. Bıylǵy 26 qarashadan bastap 27 qarashasyna qaraǵan túni synaq rejıminde alǵashqy júk kólik quraldary ótkizildi. Sátti testileýden keıin elektrondy júıe resmı túrde engizildi. Osy jyldyń basynan beri Qytaı tarapymen 190 000 birlik kóleminde júkterdi tasymaldaýǵa arnalǵan ruqsat blankilerimen almasý júrgizildi. Bul — rekordtyq kórsetkish.
Eki eldiń jaýapty vedomstvolary qosymsha 40 myń birlik kólemindegi sheteldik ruqsat blankilerin almasý boıynsha kelissózder júrgizdi. Onyń 30 myńy elektrondy formattaǵy jańa júıeni qoldaný arqyly júzege assa, al qalǵan qosymsha 10 myń dana qaǵaz júzinde boldy. Sheteldik ruqsat blankisin almasý 29 qarashada júzege asty.
Esterińizge sala keteıik, sońǵy eki jylda QHR-men sheteldik ruqsat qujattarymen almasý 50 myńnan 230 myńǵa deıin ósti. Jalpy, qazaqstandyq tasymaldaýshylardyń halyqaralyq avtotasymaldarǵa qatysý kórsetkishi 31% - dan (2021) 52% - ǵa (2023) deıin ósti.
Búgingi tańda Qazaqstan álemniń 42 elimen sheteldik ruqsat blankilerin almasýdy júzege asyrady. Bıylǵy kórsetkish — 364 705 dana sheteldik ruqsat blankisi. Bul da rekordtyq kórsetkish.
Elektrondy formattaǵy blankilerdi engizýdiń negizi Memleket basshysynyń 2023 jylǵy mamyr aıynda Sıan qalasyna jumys sapary aıasynda qol qoıylǵan qujattan bastaý alady. Al elektrondy formatqa kóshýdiń naqty ýaqyty bıylǵy qyrkúıekte oryn alǵan Premer-mınıstrdiń Shanhaıǵa issapary aıasynda qytaılyq áriptesimen kezdesý barysynda bekitildi. Elektrondy blankilerdi engizý júk tasymaldaý protsesin barynsha jeńildetip, adamı faktor men sybaılas jemqorlyq táýekelderin joıady.
Ózbekstan men Qytaı arasynda 30 kúndik vızasyz rejım engiziletinin jazǵan bolatynbyz.