Qazaqstan men Qytaı: Halyqaralyq telejoba qos elde qatar kórsetildi

ASTANA. KAZINFORM — Kúni keshe halyqaralyq Silk Way arnasy teledebat uıymdastyrǵan edi. Bul joba búgin CGTN telearnasynda da kórsetilmek. Osyǵan oraı, Qytaıdaǵy eń tanymal telearnanyń júrgizýshisi Tıan Veı «Búgin LIVE» stýdııasynda qonaq bolyp, sharadan alǵan áserimen bólisti.

— Teledebat sózsiz óte tamasha ótti. Tanymdyq ári qyzý pikirtalas boldy. Kóptegen mańyzdy másele talqylandy. «Ortalyq Azııa — Qytaı» sammıtiniń arqasynda osyndaı aýqymdy jobany uıymdastyra alǵanymyzǵa qýanyshtymyn. CGTN — Qytaıdaǵy eń tanymal telearnalardyń biri bolsa, Silk Way — Qazaqstandaǵy halyqaralyq baǵyttaǵy jetekshi arna. Osy eki arnanyń birlesip jasaǵan úlken jobasy qos elde de kórsetiledi. Silk Way arnasynda baǵdarlama alty tilde usynylsa, CGTN arqyly da kórermenderge jol tartty, — deıdi jýrnalıst.

Halyqaralyq sharaǵa tek kásibı sarapshylar ǵana emes, astanalyq stýdentter de qatysypty.

— Bul teledebatqa sarapshylar ǵana emes, Maqsut Nárikbaev atyndaǵy ýnıversıtettiń stýdentteri de qatysty. Olar kóptegen qyzyqty suraq qoıyp, ózekti máselelerdi erkin talqylady. Jastardyń qatysýy pikirtalasqa serpin berip, jańa kózqarastar usyndy, — deıdi stýdııa qonaǵy.

Tıan Veı Qazaqstanǵa ekinshi ret kelip otyr. Ol osy eki aralyqta elorda birshama ózgergenin aıtty.

— Bul — meniń Qazaqstanǵa ekinshi ret kelýim. Byltyr Shanhaı yntymaqtastyq uıymynyń sammıtine oraı kelgen bolatynmyn. Sol saparda da birlesken telejoba jasadyq. Bıyl elde kóp ózgeris bolypty. Qala kórkeıip, damyp keledi. Tek elorda ǵana emes, jalpy Qazaqstan boıynsha jańa jobalar men bastamalardy kórip, tanystym. Qytaı men Ortalyq Azııa elderi de óz ornyn álemge tanytyp jatyr. Keshe Ulttyq mýzeıge bardym. Biz sol jerde de sıýjetter túsirdik. Ol mýzeıde kórnekti tarıhı eksponattar bar eken. Óte keremet áser aldym, — deıdi ol.

Tanymal telejúrgizýshi óz eńbek jolynda kóptegen bedeldi tulǵamen suhbat júrgizgen. Dese de qarapaıym halyqpen áńgimelesý áserlirek deıdi maman.

— Men kóptegen adamnan suhbat aldym. Ásirese, BUU Bas hatshysy Antonıý Gýterresh pen Dúnıejúzilik saýda uıymynyń bas dırektorymen ótken suhbattar erekshe esimde qaldy. Bul suhbattar óte mańyzdy, óıtkeni Qytaı men Qazaqstan arasyndaǵy baılanys tek ekonomıkamen shektelmeıdi. Halyqaralyq uıym basshylarymen ǵana emes, qarapaıym adamdarmen de suhbattasý óte qyzyqty. Osyndaı áńgimeler barysynda kóp nársege kóz jetkizip, jańa nárselerdi úırenemin. Shaǵyn bolsa da, mundaı dıalogtarda mańyzdy máseleler kóteriledi, — deıdi Tıan Veı.

Stýdııa qonaǵy «Búgin LIVE» týraly da pikir bildirip, baǵdarlama ujymyna alǵysyn jetkizdi.

— Bul suhbat ta meniń esimde saqtalatyny anyq. Sizderge shyn júrekten alǵys aıtamyn. «Búgin LIVE» — óte qyzyqty ári mazmundy baǵdarlama eken. Baǵdarlamanyń kórermeni kóp bolsyn. Medıa salasyndaǵy ózara yntymaqtastyǵymyz aldaǵy ýaqytta da nyǵaıa beredi dep senemin, — deıdi CGTN telearnasynyń qyzmetkeri.

Aıta keteıik, Astanada «Tatý kórshilik jáne dostyq: bolashaqqa birge qadam» Ortalyq Azııa — Qytaı gýmanıtarlyq almasý forýmy ótti.