Qazaqstan men Qytaı ǵarysh salasyndaǵy birlesken ushýlardy talqylaýy múmkin
ASTANA. KAZINFORM — Búgin Qytaı «Shenchjoý-23» basqarylatyn ǵarysh mıssııasynyń ushyrylý kúni men ekıpaj quramyn jarııalady. Qytaıdyń basqarylatyn ǵarysh baǵdarlamasy basqarmasynyń (CMSA) bas ınjeneri Chjoý ıAtsıan Kazinform agenttiginiń Beıjińdegi menshikti tilshisine Qazaqstan men Qytaı arasyndaǵy ǵarysh salasyndaǵy yntymaqtastyq perspektıvalary týraly pikir bildirdi.
CMSA ókiliniń aıtýynsha, ekijaqty áriptestik kún tártibine birlesken basqarylatyn ǵarysh mıssııalaryn júzege asyrý jáne orbıtada keshendi ǵylymı zertteýler júrgizý máseleleri engizilýi múmkin.
— Meniń oıymsha, biz ǵaryshkerlerdiń birlesken ushýlary jáne keıingi ǵylymı eksperımentter boıynsha yntymaqtastyqty talqylaı alamyz. Sondaı-aq Aıdy odan ári zertteý salasyndaǵy ózara árekettesýdi qarastyrýǵa bolady. Bul baǵyttar birlesip talqylaýǵa jáne zerdeleýge turarlyq dep sanaımyn, — dedi Chjoý ıAtsıan.
CMSA málimetinshe, Qytaıdyń Ǵaryshkerlerdi daıarlaý jáne ǵylymı zertteý ortalyǵynda Pákistannan kelgen eki maman bilim alýda. Bekitilgen josparǵa sáıkes, olardyń biri bolashaqta paıdaly júkteme jónindegi maman retinde mıssııaǵa qatysady.
Eske sala keteıik, «Shenchjoý-23» ǵarysh kemesin ushyrý 24 mamyr kúni Beıjiń ýaqytymen 23:08–de (Astana ýaqytymen 20:08–de) Tszıýtsıýan ǵarysh aılaǵynan josparlanǵan. Ekıpaj quramyna úsh ǵaryshker engen, olardyń arasynda alǵash ret Qytaıdyń Sıangan arnaıy ákimshilik aýdanynan kelgen maman bar.
Aldaǵy mıssııa barysynda ekıpaj 100-den astam ǵylymı jáne qoldanbaly jobany júzege asyrady. Zertteý baǵdarlamasyna jasandy embrıondarmen, sırek jer metaldarynyń qorytpalarymen jáne jańa býyn akkýmýlıatorlarymen júrgiziletin eksperımentter kiredi.
Mıssııa sondaı-aq ǵaryshkerlerdiń bireýiniń orbıtada bir jyl bolýyn kózdeıtin biregeı eksperımentti qamtıdy. Bul mamannyń kandıdatýrasy ushý barysynda bekitiledi.
Buǵan deıin Qytaı «Shenchjoý-23» ǵarysh kemesiniń ushyrylý kúnin jarııalaǵany habarlanǵan edi.
