Qazaqstan men Qytaı 25 mlrd dollarǵa 60 kelisimge qol qoıdy
ASTANA. KAZINFORM – Elordada «Ortalyq Azııa – Qytaı» ekinshi ındýstrııalyq-ınvestıtsııalyq yntymaqtastyq forýmy ótip jatyr.
Іs-shara aıasynda Qazaqstan men Qytaı jalpy somasy 25 mıllıard AQSh dollaryna jýyq shamamen 60 túrli kelisimge qol qoıyldy. Bul týraly «KAZAKH INVEST» ulttyq kompanııasy» AQ basqarma tóraǵasynyń orynbasary, basqarma múshesi Madııar Sultanbek málim etti.
— Búgingi forým aıasynda yntymaqtastyq týraly kelisimder men memorandýmdar ǵana emes, ınvestıtsııalyq kelisimder, ınvestıtsııalyq sharttar jáne basqa da mańyzdy qujattarǵa qol qoıyldy. Bul — tolyq tizim emes. Forým aıasynda qol qoıýǵa ótinimder sany budan da kóp bolǵan, alaıda barlyq qujat kelisý rásiminen ótip úlgermedi, — dedi Madııar Sultanbek.
Ýaqytty únemdeý maqsatynda forým barysynda qujattarmen almasý rásimi ótti. Qujattarǵa qol qoıý úsh kezeńnen turdy, onyń ekeýi Qazaqstan Respýblıkasy Premer-mınıstriniń birinshi orynbasary Roman Sklıardyń qatysýymen ótti, ıaǵnı eń mańyzdy kelisimder. Solardyń biri búgin «QazMunaıGaz» ulttyq kompanııasynyń basshysy qol qoıǵan qujat.
— «KAZAKH INVEST» kompanııasynyń mindeti — ınvestordy súıemeldep, jobany ulttyq kompanııamen nemese memlekettik organmen birlese otyryp qol qoıý rásimine deıin jetkizý, — dedi Madııar Sultanbek.
Onyń aıtýynsha, qyzyqty jobalardyń biri — qytaılyq Seraphim kompanııasymen júzege asyrylatyn jasyl sýtegi óndirýge arnalǵan joba.
— Joba jańartylatyn energııa kózderin paıdalana otyryp óndiriletin ekologııalyq taza jáne bolashaǵy zor otyn túri — jasyl sýtegi óndirýge baǵyttalǵan. Búginde Qytaı, Japonııa, Ońtústik Koreıa, AQSh, Germanııa jáne Saýd Arabııasy syndy elder bul tehnologııaǵa erekshe kóńil bólip otyr. Sýtektik energetıka óz artyqshylyǵyn kórsete bastady, kólik pen avıatsııa quraldary elektr kólikterinen de tıimdi nátıje kórsetip otyr, — dedi Madııar Sultanbek.
Elordada «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmy ótip jatyr. Qazaqstan Respýblıkasy Premer-mınıstriniń birinshi orynbasary Roman Sklıar, ortalyq jáne jergilikti memlekettik organdardyń basshylary, Ortalyq Azııa elderiniń delegatsııalary, qytaılyq jáne óńirlik iri kompanııalardyń, sondaı-aq damý ınstıtýttarynyń basshylary qatysady.
Forým aıasynda jalpy somasy 10 mıllıard AQSh dollarynan asatyn 50-den astam ekijaqty jáne kópjaqty qujattarǵa qol qoıý josparlanyp otyr.
Sondaı-aq is-shara baǵdarlamasyna plenarlyq bólim jáne negizgi baǵyttar boıynsha paneldik sessııalar kiredi: tsıfrlandyrý jáne IT, kólik jáne logıstıka, sondaı-aq taý-ken ónerkásibi.
Búgin Qazaqstanǵa Qytaı Halyq Respýblıkasynyń tóraǵasy Sı Tszınpın keledi. Eki kúnge sozylatyn sapar barysynda elaralyq máseleler talqylanyp, memleket basshylary «Ortalyq Azııa — Qytaı» sammıtine qatyspaq.