Qazaqstan men Qyrǵyzstan shekarasynda tekseris azaıady – Memleket basshysy
ASTANA. KAZINFORM — Transshekaralyq sý resýrstaryn tıimdi ári ádil paıdalanýdyń ózektiligi arta tústi. Bul týraly búgin Aqordada Qyrǵyzstan Prezıdenti Sadyr Japarovpen kelissózden keıingi birlesken málimdeme kezinde Qazaqstan Prezıdenti Qasym-Jomart Toqaev aıtty.
«Shekarada salynyp jatqan Saýda-logıstıkalyq ındýstrııalyq keshenniń qurylysyn talqyladyq. Ony kópke sozbaı tez arada iske qosamyz dep kelistik. Bul qadam óndiristik baılanysty jáne saýda-sattyqty jandandyrmaq. Budan bólek, agroónerkásip sektoryndaǵy múmkindikterdi talqyladyq. Byltyr eki memlekettiń osy saladaǵy taýar aınalymy 10 paıyzǵa artyp, 300 mln dollarǵa jetti. Bizdiń elderimiz úshin ónim kólemin ulǵaıtý, birlesken kásiporyndar ashý, ǵylymı-zertteý ınstıtýttary arasynda baılanys ornatý óte mańyzdy. Osy oraıda eki eldiń úkimetine Jol kartasyn qabyldaý týraly tapsyrma berildi», - dedi Qasym-Jomart Toqaev.
Memleket basshysynyń aıtýynsha, jahandyq naryqtaǵy turaqsyzdyq jaǵdaıynda azyq-túlik qaýipsizdigin qamtamasyz etýge nazar aýdaryldy. Búgin qabyldanǵan sheshimder bul iske aıtarlyqtaı yqpal etedi.
«Qazaq ınvestorlary qyrǵyz ekonomıkasynyń mańyzdy sektorlaryn damytýǵa, áleýmettik ahýaldy jaqsartýǵa úles qosyp keledi. Máselen, Qazaqstan kásipkerleriniń qarjysyna Ystyqkól oblysynda kún energııasy stantsııasyn salý josparlanǵan. Budan bólek, Jalal-Abad oblysynda ferroqorytpa zaýatyn salý jóninde kelissóz júrip jatyr. Birlesken kásiporyndar tıimdi jumys isteýi úshin qolaıly jaǵdaı jasaýǵa kelistik. Osy oraıda búgin ózara ınvestıtsııalardy qorǵaý jónindegi kelisimge qol qoıyldy. Sondaı-aq elektrondy úkimet júıesin engizýge jáne damytýǵa ýaǵdalastyq. Ekonomıkany tsıfrlandyrý úshin tájirıbe almasý jáne aqparat salasyndaǵy yntymaqtastyqty nyǵaıtý týraly kelistik. Eki el arasyndaǵy alys-beristi jandandyrý - mańyzdy mindettiń biri. Bul turǵyda shekara arqyly júk ótkizý múmkindigin arttyrý jáne ony rásimdeýdi jetildirý úshin naqty sharalar qabyldanyp jatyr», - dedi Prezıdent.
Sonymen qatar Qasym-Jomart Toqaev búgin Aqordada avtobeketterdi damytý týraly is-sharalar josparyna qol qoıylǵanyn eske saldy. Basty maqsat - shekaradaǵy tekseristi azaıtyp, kólik keptelisin joıý. Bul jumys eki el úkimetteriniń erekshe baqylaýynda bolady
«Kelesi mańyzdy baǵyt - sý energetıka salasyndaǵy qarym-qatynasty úılestirý. Sońǵy jyldary transshekaralyq sý resýrstaryn tıimdi ári ádil paıdalanýdyń ózektiligi arta tústi. Osy oraıda ózara úılesimdi jumysty jalǵastyramyz dep kelistik. Bul baǵyttaǵy túıitkelderdi tezirek sheshý úshin birlesken sharalar qabyldaý qajet. Sondyqtan memleketaralyq sý sharýashylyǵy qurylymdarynyń jumys kestesin jaqyn arada bekitýge jáne ony ýaqytyly oryndaýǵa ýaǵdalastyq. Qazaqstan barlyq mindettemeni tolyq oryndaýǵa jáne mańyzdy jobalardy birlese iske asyrýǵa daıyn», - dedi Memleket basshysy.
