Qazaqstan men Grýzııa: THKB arqyly júk tasymaldaý 62 paıyzǵa artty

ASTANA. KAZINFORM – Qazaqstan men Grýzııa arasynda Transkaspıı halyqaralyq kólik baǵyty arqyly júk tasymaldaý kólemi ótken jyly 62 paıyzǵa artty. Bul týraly Premer-mınıstr Oljas Bektenov aıtty.

- Qazaqstan men Grýzııa Transkaspıı halyqaralyq kólik baǵytyn (THKB) damytý aıasynda birlese qyzmet atqaryp keledi. Osy baǵyt boıynsha ótken jyly júk tasymaldaý kólemi 62%-ǵa ósip, 4,5 mln tonnany qurady. Bul 2021 jylǵy kórsetkishten 5 esedeı kóp. Baǵyttyń áleýetin arttyrý, sondaı-aq ınfraqurylymdy, port jáne termınaldyq qýatty jaqsartý, jyljymaly quramdy ulǵaıtý, ákimshilik kedergilerdi joıý jáne tasymaldaýshylar úshin qolaıly jaǵdaı jasaý jumystary júrgizilip jatyr. Qazaqstan Úkimeti barlyq baǵyt boıynsha Qazaqstan-Grýzııa áriptestiginiń serpindi damýyn qamtamasyz etý úshin jan-jaqty jumysty jalǵastyrýǵa nıetti, - dedi ol Grýzııa Premer-mınıstri Iraklıı Kobahıdzemen kelissóz barysynda. 

Óz kezeginde Iraklıı Kobahıdze Grýzııanyń Qazaqstanmen ekijaqty baılanystardy damytýǵa jáne nyǵaıtýǵa múddeli ekenin atap ótti. 

- Bul meniń Qazaqstanǵa ekonomıkalyq jáne mádenı ózara is-qımyldy nyǵaıtýǵa baǵyttalǵan alǵashqy ári mańyzdy resmı saparym. Búginde memleketterimiz arasynda yntymaqtastyqtyń túrli baǵytynda úlken jetistikter bar. Biz Qazaqstanmen jan-jaqty áriptestikti odan ári damytýǵa múddelimiz, - dedi Iraklıı Kobahıdze.

Aıta keteıik, buǵan deıin 20 jyl ishinde el ekonomıkasyna grýzııalyq ınvestorlar qansha qarjy quıǵanyn jazǵan edik.