Qazaqstan men Germanııa ýnıversıtetteriniń Konsortsıýmy qurylady
ASTANA. KAZINFORM — Dáýlet Serikbaev atyndaǵy Shyǵys Qazaqstan tehnıkalyq ýnıversıtetinde «Ǵylym jáne bilim: Qazaqstan men Germanııanyń seriktestigi» atty II Qazaqstan-Germanııa aptalyǵy saltanatty túrde óz jumysyn bastady. Bul týraly QR Ǵylym jáne joǵary bilim mınıstrliginiń resmı saıty jarııalady.
Forým jumysyna Shyǵys Qazaqstan oblysynyń ákimi Nurymbet Saqtaǵanov qatysty.
Onlaın-formatta sóz sóılegen QR Ǵylym jáne joǵary bilim mınıstri Saıasat Nurbek ǵylym men bilim salasyndaǵy halyqaralyq yntymaqtastyqtyń strategııalyq mańyzyna toqtalyp, Germanııa ýnıversıtetteriniń ındýstrııa bolashaǵy úshin kadrlar daıarlaýdaǵy negizgi seriktes ekenin erekshe atap ótti.
— Instıtýttyń qurylýy QR Prezıdenti Qasym-Jomart Toqaev pen Germanııa Federatıvtik Respýblıkasynyń Prezıdenti Frank-Valter Shtaınmaıerdiń saıası erki men qoldaýynyń arqasynda múmkin boldy. 2024 jyly olardyń yqpalymen birlesken ǵylymı jáne bilim berý bolashaǵymyzdyń berik irgetasy qalandy. Búgin biz sol irgetastyń jańa múmkindikter men perspektıvalarǵa jol ashyp otyrǵanyn kórip otyrmyz, — dedi mınıstr.
Mınıstr ótken jyly D. Serikbaev atyndaǵy ShQTÝ bazasynda ashylǵan Qazaqstan-Germanııa ǵylym jáne tehnologııalar ınstıtýty elimizdiń álemdik bilim jáne ǵylym keńistigine yqpaldasýynyń naqty quralyna aınalǵanyn atap ótip, mundaı ortalyqtardy, ásirese aımaqtyq ýnıversıtetter negizinde damytýdy mınıstrlik árdaıym qoldaıtynyn jetkizdi.
Qonaqtar qatarynda QR ǴJBM Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan, Germanııanyń Qazaqstandaǵy Tótenshe jáne Ókiletti Elshisi Monıka Iversen, Qazaqstan-German ýnıversıtetiniń prezıdenti Volrad Rommel, Germanııanyń jetekshi ýnıversıtetteriniń ǵalymdary men basshylary, sondaı-aq DAAD, DENA, Frıdrıh Ebert qory, Konrad Adenaýer qory, DFG, CASIB jáne Goethe-Institut ókilderi boldy. Aımaqtyq seriktes kásiporyndar — «Kazzinc», Óskemen tıtan-magnıı kombınaty, Úlbi metallýrgııa zaýyty jáne basqa da uıymdar belsendi qatysty.
Aptalyqtyń ashylýyndaǵy mańyzdy oqıǵalardyń biri Qazaqstan men Germanııa ýnıversıtetteriniń Konsortsıýmyna qol qoıý boldy. Bul jańa akademııalyq alańǵa D. Serikbaev atyndaǵy ShQTÝ, Qazaqstan-German ýnıversıteti, Fraıberg Taý-ken akademııasy tehnıkalyq ýnıversıteti, Bohým Rýr ýnıversıteti, Klaýstal tehnıkalyq ýnıversıteti, Dortmýnd tehnıkalyq ýnıversıteti jáne Dýısbýrg-Essen ýnıversıteti kirdi. Konsortsıým birlesken ǵylymı zertteýlerge, tehnologııalar transferine, stýdentter men oqytýshylar almasýyna, sondaı-aq taý-ken isi, geologııa, sırek kezdesetin metaldardy qaıta óńdeý, energetıkalyq jáne ekologııalyq tehnologııalar salalaryndaǵy qoldanbaly jobalardy júzege asyrýǵa serpin beredi.
Óz sózinde vedomstvo basshysy bul bastamalardyń barlyǵy Memleket basshysy Qasym-Jomart Toqaevtyń Joldaýynda aıqyndalǵan basymdyqtarmen tikeleı úndesetinin atap ótti. Joldaýda ǵylymdy damytýǵa, tsıfrlyq transformatsııaǵa jáne jańa ındýstrııalyq dáýir úshin kadrlar daıarlaýǵa aıryqsha nazar aýdarylǵan.
II Qazaqstan-Germanııa aptalyǵy Memleket basshysynyń «Jasandy ıntellekt dáýirindegi Qazaqstan» Joldaýynyń basym baǵyttaryna tolyq sáıkes keledi. Prezıdent atap ótkendeı, taý-ken metallýrgııa kesheni — Qazaqstan ındýstrııalyq qańqasynyń senimdi tiregi, al salanyń bolashaǵy ǵylymdy, ınnovatsııalardy damytýǵa jáne kásibı kadrlardy daıarlaýǵa tikeleı baılanysty.
Sonymen qatar Qazaqstannyń Germanııadaǵy Elshisi Nurlan Onjanovtyń bastamasymen qurylǵan Aleksandr fon Gýmboldt atyndaǵy Turaqty damý jónindegi pánaralyq ortalyqtyń ashylýy da mańyzdy oqıǵa boldy. Bul ortalyq ınnovatsııalardy engizýge, akademııalyq almasýlarǵa jáne turaqty damý qaǵıdattaryn ilgeriletýge baǵyttalǵan halyqaralyq zertteý jáne bilim berý alańyna aınalady.
Eske salaıyq, mınıstr Saıasat Nurbek «Bolashaq» baǵdarlamasynyń aıasynda endi ataqty Smıtson ınstıtýty negizinde antropologııa, tarıh syndy salalarda taǵylymdamalar ótkiziletinin aıtqan edi.