Qazaqstan men Estonııa rektorlarynyń forýmy ótti
ASTANA. KAZINFORM – Estonııa Prezıdenti Alar Karıstiń Qazaqstanǵa jasaǵan memlekettik sapary aıasynda Qazaqstan men Estonııanyń joǵary jáne joǵary oqý ornynan keıingi bilim berý salasyndaǵy jetekshi uıymdarynyń qatysýymen dóńgelek ústel ótti. Bul týraly Ǵylym jáne joǵary bilim mınıstrligi habarlady.
Forýmdy Estonııa Prezıdenti ashyp, jahandyq ózgerister jaǵdaıynda bilim berýdiń mańyzdy róline toqtaldy.
– Bilim árqashan progrestiń negizi bolyp keldi. Búginde ol tarıhtaǵy eń aýqymdy transformatsııalardyń birin bastan ótkerip jatyr. Jasandy ıntellekt pen tsıfrlyq tehnologııalar bizdiń oqý, jumys isteý jáne bir-birimizben ózara árekettesý tásilderimizdi ózgertýde. Dál osyndaı jyldam ózgerister kezeńinde ýnıversıtetter men ǵylymı-zertteý ınstıtýttary qoǵamǵa kúrdeli úderisterdi túsinýge kómektesip, ınnovatsııalardyń adam damýyna qyzmet etýin qamtamasyz etý arqyly sheshýshi ról atqarady, – dedi A.Karıs.
Forým jumysyna QR Ǵylym ı joǵary bilim mınıstri Saıasat Nurbek, vıtse-mınıstr Gúlzat Kóbenova, sondaı-aq Estonııa Bilim jáne zertteý mınıstrliginiń vıtse-mınıstri Raıvo Vental qatysty. Estonııa Prezıdentimen resmı delegatsııa quramynda Qazaqstanǵa jetekshi ýnıversıtet rektorlary keldi.
Estonııa tarapynan forýmǵa Tallinn University, Estonian Academy of Arts, Estonian University of Life Sciences, Tallinn University of Technology, Estonian Academy of Music and Theatre, Tartu University atty joǵary oqý oryndarynyń ókilderi qatysty.
Kezdesý barysynda shaqyrylǵan sarapshy – ekitildi jáne kóptildi bilim berý, bilim berý júıelerin reformalaý jáne adamı kapıtaldy damytý salasyndaǵy tanymal eston zertteýshisi Peeter Mehısto dáris oqydy. Ol joǵary bilim berý salasynda kadr daıarlaýdyń ozyq tájirıbelerimen bólisý maqsatynda «Estonia's PISA Success Story: Key Investments» taqyrybynda baıandama jasady.
Talqylaý barysynda joǵary bilim berý salasyndaǵy saıasat baǵyttary, ınstıtýtsıonaldyq strategııalar, ortaq syn-tegeýrinder, oqytý men oqýdaǵy ınnovatsııalyq jáne birlesken tásilder, sondaı-aq birlesken ǵylymı ortalyqtar men zerthanalar qurý máseleleri qarastyryldy. Tsıfrlandyrýdy damytý jáne jasandy ıntellekt tehnologııalaryn bilim berý úderisine engizý baǵytyndaǵy yntymaqtastyqqa erekshe nazar aýdaryldy.
Forým ekijaqty qujattarǵa qol qoıý rásimimen aıaqtaldy. Atap aıtqanda, ál-Farabı atyndaǵy Qazaq ulttyq ýnıversıteti men Tallın tehnologııalyq ýnıversıteti arasyndaǵy yntymaqtastyq týraly memorandým, Qazaq ulttyq qyzdar pedagogıkalyq ýnıversıteti men Tallın ýnıversıteti arasyndaǵy ózara túsinistik týraly memorandým, M.Áýezov atyndaǵy Ońtústik Qazaqstan ýnıversıteti men Tallın ýnıversıteti arasyndaǵy ózara túsinistik týraly memorandým, M.Nárikbaev ýnıversıteti men Tallın ýnıversıteti arasyndaǵy ózara túsinistik týraly memorandým, Sh.Ýálıhanov atyndaǵy Kókshetaý ýnıversıteti men Estonııanyń tabıǵı ǵylymdar ýnıversıteti arasyndaǵy ózara yntymaqtastyq týraly kelisim, Almaty Management University jáne Tallın tehnologııalyq ýnıversıteti arasyndaǵy yntymaqtastyq týraly kelisim qabyldandy.
Aıta keteıik, Qasym-Jomart Toqaev pen Alar Karıs kelissózder qorytyndysy boıynsha Birlesken málimdeme qabyldady.