Qazaqstan men Chehııa parlamentaralyq yntymaqtastyqty nyǵaıtýǵa nıetti

NUR-SULTAN. QazAqparat – Qazaqstan men Chehııa parlamentaralyq yntymaqtastyqty nyǵaıtýǵa nıetti. Bul týraly Qazaqstan Elshisi Marat Tájınniń Chehııa Parlamentiniń tómengi palatasynyń depýtattarymen kezdesýinen málim boldy, dep habarlaıdy QazAqparat.

QR Syrtqy ister mınıstrligi baspasóz qyzmetiniń habarlaýynsha, kezdesý barysynda Qazaqstan Elshisi eki el arasyndaǵy qarym-qatynastardyń dástúrli dostyq jáne senimdi sıpatyn, sondaı-aq Qazaqstannyń ekijaqty jáne kópjaqty formattaǵy yntymaqtastyqty odan ári nyǵaıtýǵa jáne damytýǵa umtylysyn atap ótti.

M.Tájın cheh parlamentarıılerin Prezıdent Qasym-Jomart Toqaev júrgizip otyrǵan baǵytqa sáıkes elimizde bolyp jatqan saıası jáne áleýmettik-ekonomıkalyq reformalar týraly egjeı-tegjeıli habardar etti. Parlamentaralyq yntymaqtastyqty nyǵaıtý taqyrybyn talqylaı otyryp, Elshi ózara is-qımyldy jandandyrýdy, atap aıtqanda, eki el parlamentteriniń parlamentaralyq «Dostyq toptary» men yntymaqtastyq toptary depýtattardyń ózara saparlaryn uıymdastyrýdy usyndy.

Cheh depýtattary QR Prezıdentiniń Joldaýyna, Qazaqstandy odan ári demokratııalandyrý baǵytynyń jalǵasy bolyp tabylatyn jańa saıası baǵdarlamaǵa úlken qyzyǵýshylyq tanytty.