Qazaqstan men Bolgarııa arasyndaǵy taýar aınalymy ótken jyly 390,8 mln dollarǵa jetti
5 maýsymda Qazaqstan Respýblıkasy men Bolgarııa Respýblıkasy arasyndaǵy dıplomatııalyq qarym-qatynastardyń ornaǵanyna 30 jyl tolady.
Aıtýly oqıǵaǵa oraı eki memlekettiń basshylary Qasym-Jomart Toqaev pen Rýmen Radev, sondaı-aq Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi men Bolgarııa Syrtqy ister mınıstri Teodora Genchovska ózara quttyqtaý hat almasty.
Nur-Sultan men Sofııada mereıtoıǵa oraı eki memlekettiń syrtqy ister mınıstrlikterinde resmı kezdesýler ótti. Qazaqstan Syrtqy ister mınıstriniń orynbasary Roman Vasılenko Bolgarııa Elshisi Boıan Hadjıevti, al Bolgarııa Syrtqy ister mınıstriniń orynbasary Vasıl Georgıev Qazaqstan Elshisi Temirtaı Іzbastındi qabyldady.
R. Vasılenko «Tarıhı meje boıynsha osyndaı qysqa kezeń ishinde senimdi saıası dıalog qalyptasyp úlgerdi. Ol ilgeri damyp keledi, buǵan ekijaqty kún tártibindegi problemalyq máselelerdiń joqtyǵy jáne joǵary jáne bıik deńgeılerdegi baılanystardyń turaqty dınamıkasy dálel bola alady», – dep atap ótti.
Dıplomattar aldaǵy jyldary jan-jaqty yntymaqtastyq saıası, saýda-ekonomıkalyq jáne mádenı-gýmanıtarlyq salalarda halyqtarymyzdyń ıgiligi úshin odan ári keńeıe beretinine senim bildirdi.
Eki el arasynda joǵarǵy jáne úkimettik deńgeıde turaqty baılanystar ornatylǵanyn, sondaı-aq parlamentaralyq dıalogtyń qarqyndy damý serpinin rızashylyqpen atap ótti.
Taraptar saýda-ekonomıkalyq jáne ınvestıtsııalyq ózara is-qımyldy odan ári keńeıtý qajettiligine erekshe toqtaldy. Qazaqstan, Bolgarııa úshin Ortalyq Azııa elderi arasyndaǵy eń iri saýda seriktesi bolyp tabylady. Sonymen birge, Bolgarııa Qazaqstannyń Balqan óńiri memleketteri arasyndaǵy top-5 saýda seriktesteriniń qataryna kiredi.
Sondaı-aq ınvestıtsııa salasyndaǵy ózara is-qımyl josparly túrde damýda. Qazaqstan ekonomıkasyna bolgar ınvestıtsııalarynyń jıyntyq jalpy aǵyny 2005-2021 jyldar aralyǵynda 55,8 mln dollarǵa jetti. Bul shama kúnnen-kúnge artyp keledi.
Týrızm jáne aýyl sharýashylyǵy sekildi salalarda perspektıvaly birlesken jobalardy damytý úshin úlken áleýet bar.
Eki el bir-birinen myńdaǵan shaqyrym qashyqtyqta ornalasqanyna qaramastan, olardy ortaq tarıhı taǵdyr biriktirip otyr. Qazaqstannyń shyqqan tegi bolgar azamattary el ómiriniń belsendi qatysýshylary bolyp tabylady. Bolgarlardyń ulttyq tilin, mádenıeti men dástúrlerin damytý maqsatynda Qazaqstanda bolgar etnomádenı birlestikteri Aqtóbe oblysyndaǵy «Vıara», Nur-Sultanda «Zlata», Pavlodar oblysynda «Slavıane» jáne Atyraý oblysyndaǵy «Vozrojdenıe» ortalyqtary ashyldy. Pavlodar oblysynda K. B. Darjýman atyndaǵy Ulttyq jańǵyrý mektebiniń bolgar bólimi tabysty jumys isteýde.
QR Syrtqy ister mınıstrligindegi kezdesýdiń qorytyndysy boıynsha eki memleket jáne halyqtar arasynda ózara tıimdi yqpaldastyq pen dostyqtyń aldaǵy ýaqytta da qaryshty damýyna ortaq senim bildirildi.
