Qazaqstan men Belarýs premer-mınıstrleri Astana Hub-qa bardy
ASTANA. KAZINFORM — Qazaqstan Premer-mınıstri Oljas Bektenov elimizge resmı saparmen kelgen Belarýs Premer-mınıstri Aleksandr Týrchınmen birge Astana Hub-qa bardy. Bul týraly Úkimettiń baspasóz qyzmeti málim etti.
Belarýs Respýblıkasynyń úkimettik delegatsııasy Qazaqstandaǵy tsıfrlyq ındýstrııasynyń damýy, ınnovatsııalyq startaptar jáne GovTech sheshimderimen tanysty.
Prezıdent Qasym-Jomart Toqaevtyń tsıfrlyq memleketti jedel damytý jáne ekonomıkanyń barlyq salalaryna ınnovatsııalyq tehnologııalardy engizý jóninde qoıǵan mindeti sheńberinde Úkimet júıeli jumystar júrgizýde. Búgingi tańda Qazaqstan BUU-nyń onlaın qyzmetter ındeksi boıynsha álemde 10-shy, al TMD-da 1-shi orynda, sondaı-aq jahandyq elektrondy úkimetti damytý ındeksinde 24-shi orynda tur. Elimizdegi memlekettik qyzmetterdiń 90%-dan astamy azamattarǵa onlaın rejımde kórsetiledi.
Innovatsııalar úshin tartymdy ortalyqqa aınalǵan Astana Hub alańynda delegatsııa jasandy ıntellektini paıdalaný arqyly túrli salalarda júzege asyrylatyn qazaqstandyq startaptarmen tanysty. Olar – eresekter men balalardyń qaýipsizdigin qamtamasyz etýde Aman, sporttyq analıtıkany damytýda Mirai Tech, pılotsyz ushý tehnologııasyn ázirleýde aDrone.kz jobalary. Sondaı-aq bilim berýde TrustExam jáne Codiplay, densaýlyq saqtaýda Ascle jáne basqa da salalarda qoldanylatyn JI-startaptar usynylǵan. 2024 jyly Qazaqstandaǵy IT-qyzmetteriniń eksporty 20%-dan astam ósim kórsetip, $880 mln-nan asty.
Peer-to-peer ınnovatsııalyq oqytý júıesi qoldanylatyn Tomorrow mektebine barǵan kezde Qazaqstannyń joǵary bilikti IT mamandardy daıarlaý boıynsha júrgizip jatqan jumystaryna nazar aýdartyldy. Jalpy Qazaqstanda 500 myńǵa jýyq azamat jasandy ıntellekt negizderin oqyp jatyr.
Odan bólek, Belarýs Premer-mınıstrine Tsıfrlyq keńseniń qyzmeti jáne Egov Mobile, Egov Business, Smart Data Ukimet, JI-ge negizdelgen ulttyq platforma men taǵy da basqalardyń tehnologııalyq múmkindikteri tanystyryldy. Olar – halyq pen bıznestiń yńǵaılylyǵyna, sondaı-aq memlekettik organdar jumysynyń tıimdiligine baǵyttalǵan.
Eske sala keteıik, buǵan deıin Úkimette Almaty áýejaıyn jańǵyrtý jumystarynyń barysy qaraldy.