Qazaqstan men Ázerbaıjannyń taýar óndirýshileri 38 mln dollarǵa kelisimshart jasady
Jıynǵa azyq-túlik, hımııa jáne munaı-hımııa ónimderi, farmatsevtıka, metall prokattaý jáne metall óńdeý, mashına jasaý, qurylys materıaldaryn óndirý, IT salasynda jumys isteıtin 23 otandyq kásiporyndar qatysty.
Olardyń qatarynda eksporttyq akseleratsııa baǵdarlamasyna qatysýshylar da boldy. Ázerbaıjan tarapynan qazaqstandyq bıznespen yntymaqtastyqqa múddeli 100-den astam kompanııa qatysty.
Jıynnyń resmı bólimin ashqan Qazaqstan Elshisi Serjan Ábdikárimov elimizde ótken konstıtýtsııalyq referendýmnyń mánine toqtalyp, onyń nátıjeleri ekonomıka men ulttyq kásipkerlikti damytýǵa yqpal etetinin jáne ekonomıkada ashyq jáne ádil oıyn erejelerin qalyptastyratynyn aıtty.
Ol sondaı-aq dıplomatııalyq qatynastardyń 30 jylynda «ekijaqty jáne kópjaqty yntymaqtastyq saıası, saýda-ekonomıkalyq, energetıkalyq, tranzıttik, kóliktik, aýylsharýashylyq, mádenı-gýmanıtarlyq jáne basqa da salalardaǵy júıeli jáne kóp qyrly sıpatqa ıe bolǵanyn» atap ótti.
Jınalǵandardyń nazaryn qazirgi jaǵdaıda Transkaspıı halyqaralyq kólik baǵytyn (THKB) álemdik saýda, tranzıt jáne jabdyqtaý júıesine durys ıntegratsııalaý qajettiligine aýdara otyryp, S. Ábdikárimov Qazaqstannyń Ázerbaıjandaǵy Saýda úıiniń sheńberinde «TDK-Logistics» logıstıkalyq bólimshesiniń jumys isteıtinin eske saldy. Sonymen qatar, ol 2022 jylǵy 4-5 shildede Nur-Sultanda úkimetaralyq komıssııanyń kezekti otyrysy ótetinin aıtyp, múddeli kásipkerlerdi ekijaqty ınvestıtsııalyq jáne saýda-ekonomıkalyq yntymaqtastyqty nyǵaıtatyn eki eldiń isker toptary arasyndaǵy turaqty dıalog alańy retinde qurylyp jatqan «Qazaqstan-Ázerbaıjan iskerlik keńesine» qosylýǵa shaqyrdy.
«QazTrade» AQ bas dırektory Azamat Asqaruly qazirgi jaǵdaıda eki el arasyndaǵy yntymaqtastyq jańa deńgeıge kóterilip kele jatqanyn aıtty.
«Sońǵy jyldary álemde aımaqtyq saýda damyp keledi. Kaspıı óńiri, eń aldymen, Ázerbaıjan men Qazaqstannyń ózara taýar aınalymyn arttyrýǵa áleýeti zor. Onyń ústine qazir Eýropadan Azııaǵa tranzıttik aýmaq retinde eki eldiń róli artyp keledi, biz tranzıttik elder retinde ǵana emes, ekonomıkalyq áriptester retinde de ishki ózara is-qımylymyzdy tereńdete alamyz jáne tereńdetýimiz kerek», - dedi ol.
Bıylǵy jyldyń basynan beri eki eldiń Kaspııdegi teńiz saýda porttary arqyly 2021 jylǵy sáıkes kezeńmen salystyrǵanda eki ese kóp júk tasymaldandy. Jyl sońyna deıin THKB baǵyty boıynsha kólik tasymaly alty esege artady dep kútilýde.
QazTrade basshysy búgingi tańda 80-nen astam qazaqstandyq kompanııa óz ónimderin Ázerbaıjanǵa turaqty eksporttaýshy bolyp tabylatynyn atap ótti. Bul rette Qazaqstannan 272 mln AQSh dollar somasyna 105 taýar pozıtsııasy boıynsha eksportty ulǵaıtý áleýeti bar, onyń ishinde metallýrgııa ónimderi, azyq-túlik jáne sýsyndar, mashına jasaý jáne hımııa ónerkásibi ónimderi.
Óz kezeginde, Ázerbaıjan Shaǵyn jáne orta bıznesti damytý agenttigi basqarmasynyń tóraǵasy Orhan Mamedov 1995-2021 jyldary Ázerbaıjannyń qazaqstandyq shıkizat emes sektoryna salǵan ınvestıtsııasy 200 mln AQSh dollardan astam somany quraǵanyn atap ótti. Qazaqstannyń ázerbaıjandyq shıkizattyq emes sektoryna salǵan ınvestıtsııasy shamamen 100 mln AQSh dollardy qurady.
«Elimizde jumys isteıtin sheteldik kompanııalardyń 159 qazaqstandyq kapıtalmen qurylǵan. Bul kompanııalar ekonomıkanyń ónerkásip, qurylys, saýda, aýyl sharýashylyǵy, kólik jáne qyzmet kórsetý sııaqty salalarynda jumys isteıdi», - dedi ol.
Sondaı-aq, is-shara aıasynda «Qazaqstan standarttaý jáne metrologııa ınstıtýty» RMK-nyń bas dırektory Ǵabıt Muhambetov, Eýrazııalyq ekonomıkalyq odaq sotynyń sýdıasy Jolymbet Báıishev, Ázerbaıjan Respýblıkasy Mıllı Medjlısiniń depýtaty Mýshfıg Djafarov jáne PwC Eýrazııa aımaǵynyń dırektory Myrza Sokýrov sóz sóıledi.
Saýda-ekonomıkalyq mıssııa aıasynda qazaqstandyq taýar óndirýshilerge eki eldiń ulttyq kompanııalary men isker toptarynyń qatysýymen B2B formatynda ekijaqty kelissózder, Ázerbaıjan Respýblıkasynyń iri saýda jelilerimen jáne dıstrıbıýtorlarymen kezdesýler uıymdastyryldy.
Olardyń nátıjesinde jalpy somasy 38 mln AQSh dollarynan astam 8 eksporttyq kelisimshartqa qol qoıyldy. Ázerbaıjanǵa qazaqstandyq azyq-túlik ónerkásibiniń taýarlaryn (kúnbaǵys maıy, kúrish, tuz, jarma jáne daıyn taǵam jıyntyqtary), metalprokat, hımııa jáne lak-boıaý ónimderin jetkizýge kelisim-sharttar jasaldy.
Sonymen qatar, Qazaqstannyń Standarttaý jáne metrologııa ınstıtýty men Ázerbaıjannyń Standarttaý, metrologııa jáne patent jónindegi memlekettik komıteti arasynda kelisimge, sondaı-aq «QazTrade» AQ men «Gandja kásipkerleri» qoǵamdyq birlestigi arasyndaǵy yntymaqtastyq týraly memorandýmǵa qol qoıyldy.
