Kabýlda Qazaqstannyń saýda úıi ashylýy múmkin
ASTANA. KAZINFORM – Premer-mınıstrdiń orynbasary — ulttyq ekonomıka mınıstri Serik Jumanǵarın Aýǵanstan premer-mınıstriniń orynbasaryna Qazaqstannyń Kabýldaǵy saýda úıin ashýdy usyndy, dep habarlaıdy Úkimettiń baspasóz qyzmeti.
Kabýlǵa sapary barysynda Premer-mınıstrdiń orynbasary — ulttyq ekonomıka mınıstri Serik Jumanǵarın Qazaqstan halqynan Aýǵanstan halqyna gýmanıtarlyq kómektiń ekinshi jartysyn tapsyrdy.
Sondaı-aq Serik Jumanǵarın osy eldiń Premer-mınıstriniń orynbasary Abdýl Ǵanı Baradarmen kezdesti.
Qazaqstan Aýǵanstanǵa gýmanıtarlyq kómektiń OA-daǵy iri jetkizýshisi
2021 jyldan beri Qazaqstan Aýǵanstanǵa ondaǵan myń tonna un, azyq-túlik, dári-dármek, turmystyq zat pen jyly kıim jibergen. Sonymen qatar bıyl naýryz aıynda Almatyda Ornyqty damý maqsattary boıynsha Ortalyq Azııa men Aýǵanstan elderine arnalǵan BUU aımaqtyq ortalyǵy ashyldy. Serik Jumanǵarın Abdýl Ǵanı Baradarmen kezdesýde atap ótkendeı, aımaqtyq ortalyqty qurýdaǵy negizgi maqsat — OA elderiniń Aýǵanstanmen áleýmettik-ekonomıkalyq jáne iskerlik yntymaqtastyǵyn jandandyrý. Ortalyq Azııa elderi qazaqstandyq bastamaǵa qoldaý bildirdi.
Ártaraptandyrý esebinen taýar aınalymy $3 mlrd-ty qurady
Qazaqstan Aýǵanstannyń negizgi saýda seriktesteriniń ondyǵyna kiredi. Astyq pen un qazaqstandyq dástúrli taýarlar sanalady. 2024 jyly Aýǵanstan naryǵyna qazaqstandyq qant eksportynyń aıtarlyqtaı ósýi baıqaldy — 143 myń tonna. Bul 2023 jylmen salystyrǵanda birneshe ese kóp (19,1 myń tonna). Aýǵanstan naryǵyna kondıterlik jáne un ónimin jetkizý kórsetkishi artyp keledi. Qazaqstan sondaı-aq erte pisetin aýǵan kókónisin elorda bazaryna jetkizýge múddeli.
Ótken jyldyń sońynda eki el taýar aınalymyn $3 mlrd-qa ulǵaıtý jónindegi jol kartasyna qol qoıdy. Aýǵanstan aýmaǵynda túrli paıdaly qazba óndirýdiń orasan zor áleýetin eskere otyryp, ózara ınvestıtsııanyń málimdelgen kólemine Aýǵanstan ken ornynyń resýrsyn barlaý men óndirý esebinen qol jetkizý josparlanyp otyr. Qazaqstandyq bıznes jer qoınaýynyń perspektıvaly ýchaskelerin izdeýge qarajat salýǵa úlken qyzyǵýshylyq bildirip otyr.
14 sáýirde Aýǵanstanǵa Qazaqstannan barǵan geolog-mamandar, ınjenerler toby Aýǵanstannyń taý-ken ónerkásibi jáne munaı mınıstrliginiń qoldaýymen birqatar ken ornyn aralady. QR Ónerkásip jáne qurylys vıtse-mınıstri Iran Sharhan atap ótkendeı, mamandar Nurstan provıntsııasynda berıllıı, qorǵasyn jáne myrysh tabylyp otyrǵan ken oryndarynan 130 keli ken synamasyn aldy. Endi zerthanada neǵurlym egjeı-tegjeıli taldaý úshin synamalar Qazaqstanǵa jiberiledi. Nátıje alynǵannan keıin qazaqstandyq tarap ken ornyn odan ári ıgerý úshin neǵurlym aýqymdy kelissóz formatyna kirisýge daıyn.
Qazaqstan men Aýǵanstandaǵy jańa saýda úıleri
Jol kartasynda belgilengen is-sharalardy jandandyrý úshin Serik Jumanǵarın Aýǵanstan Premer-mınıstriniń orynbasaryna Qazaqstannyń Kabýldaǵy saýda úıin ashýdy usyndy. Abdýl Ǵanı Baradar bul usynysty qoldap, aýǵan tarapy da Qazaqstanda óziniń saýda bazaryn ashqysy keletinin atap ótti. Sondaı-aq, qazaqstandyq taraptan aýǵan tarapy múddeli bolǵan jaǵdaıda «QazTehna» JShS óndiretin qazaqstandyq avtobýstardy jetkizý múmkindigin qarastyrý usynyldy. Jańa saýda úıleri yntymaqtastyqtyń ártúrli baǵyttary boıynsha ózara ınvestıtsııalardy jandandyrýǵa yqpal etedi.
Sonymen qatar Serik Jumanǵarın Aýǵanstannyń baılanys jáne aqparattyq tehnologııalar mınıstri Nadjıbýlla Hakkanımen kezdesti. Ol qazaqstandyq kompanııalar Aýǵanstandaǵy ınfraqurylymdyq jáne telekommýnıkatsııalyq jobalardyń qurylysyna qatysýǵa qyzyǵýshylyq tanytyp otyrǵanyn atap ótti. Týrgýndı — Gerat jańa temirjol telimin salý kezinde optıkalyq kabel tóseý jumysyna birlesip qatysýdy usyndy.
Saýda jáne ónerkásip mınıstri Nurıddın Azızımen kezdesýde eki eldiń ózara taýar aınalymyn ártaraptandyrý múmkindigi talqylandy.
Osyǵan deıin Qazaqstannan Aýǵanstanǵa 36 gýmanıtarlyq kómek vagony jetkizilgenin habarlaǵan edik.